Fiksimini Basa Sunda

Update: 31 Maret 2012 03:30:09

Milari Pangarang

Statistik

Jumlah Mémber	2.314
Jumlah Fikminer	917
Jumlah Naskah	16.002
Jumlah Koméntar	145.005
Jumlah Jempol	199.539

Naskah Unggal Bulan

Bulan Séptémber 2011	1.533
Bulan Oktober 2011	2.339
Bulan Nopémber 2011	2.308
Bulan Désémber 2011	2.115
Bulan Januari 2012	2.148
Bulan Fébruari 2012	2.641
Bulan Maret 2012	2.918

Naskah Populér

I Miss You..!
Ku Godi Suwarna
349 koméntar, 111 jempol

Ringkang Sang Dangiang
Ku Godi Suwarna
277 koméntar, 119 jempol

Lalakon Awon
Ku Godi Suwarna
253 koméntar, 106 jempol

Rotasi Sakeclak Cai
Ku Godi Suwarna
236 koméntar, 85 jempol

Gambar Parahu Dina Kikisik
Ku Godi Suwarna
215 koméntar, 98 jempol

Koméntar Populér

Godi Suwarna: SAJAK TI JALAN KA MANA ngémploh pucuk-pucuk entéh mulas léngkob jeung lamping nu keur dumeling sapanjang jalan rumangsang néang hibar langit beurang hawar-hawar, kahariwang dilaungkeun kawih leuweung sabot mipir jegir pasir jeung kaketir nangtang ringkang lalaunan angin rintih ngusapan léngkah guligah luang-léong ngitung tikungan kalah kérok balas nalék pulas haté halimunan balitungan antara was-was mun nyorang lelewang jungkrang jeung panggupay ti palebah mumunggang gunung panungtung padungdengan sabot méga katémbong beuki meuleukmeuk samar-samar nyidem hujan jeung guludug beuki jauh nyusud waktu bet kasarung satengahing kahayang nu pasulabreng antara ngajuringkang ka landeuhkeun, ka sisi talaga wening atawa rék terus nyusul jangjang julang kumalayang nilar sayang humandeuar ti tetelar ka tetelar nu horéng teu matak kelar kalah awor jeung geuneuk kelir karémpan ngalulungsar di totowang mépéndé rurungsing jantung nu gumuruh silantangan sanggeus ngasruk alimusa ‘na rerembet tegal mangsa beuki surti yén pucuk gunung panungtung ngancik dina sanubari ngan kari ngaragap diri nu mindeng ngaberung mangprung bari naker ieu ketak saméméh béakkeun hégak
20 jempol

Nazarudin Azhar: Kang Tatang Sumarsono, hatur nuhun pisan seratanana, mugia kamandang Akang tiasa kaaos ku sadayana, kanca FBS. Leres, perkawis komen saena ngandung "nilai plus" sakumaha kasauran Akang. Tujul kana ajen karya nu dikomentaran. Mung panginten dina leresan ieu, teu sadayana kanca tapis ngungkabkeun pamanggihna dina ngajen hiji karya. Malah boa seueur nu ngan ukur resep nyerat, tapi lebah kedah ngomentar nu daria neori mah rupina teu sadaya gaduh pakakasna. Sok sanaos anjeunna katajieun ku karya nu dikomentaranana, atanapi mendak kakirang dina eta karya, namung sesah kumaha ngedalkeun pamendakna. Seuseueurna komentar teh ukur kecap atanapi kalimah reaktif: edun euy, edas, asiiik, wah mantap, upamina. Numutkeun sim kuring mah komentar kitu teh sami sareng upami urang keprok sabada ninggal pintonan. Eta mah pintonan naon we, nu bisa ngabandang pangaresep urang, nu matak kataji. Boh musik, teater, tari, debus, balap kuda, ngadu domba, dangdut, atanapi naon wae. Keprok teh minangka ekspresi, pangajen urang ka nu dilalajoan. Da sok sanaos resep kana eta pintonan, teu sadayana tiasa nembrakkeun lebah mana resepna, ku naon make resep. Da mun teu resep mah moal parat boa lalajona ge. Kitu deui dina maca fikmin. Ngomentar teh seseringna (ieu mah sim kuring) kajurung ku rasa nu spontan. Mencet jempol, laju nulis, kalan-kalan mah ukur: "Ngageleser Ang!" upamina, mun karyana alus. Memang peryogi, komentar nu kritis, atanapi komentar nu apresiatif, nu katawisna ayeuna langkung seueur diserat utamina ku "fikminer senior" :D, nu tangtosna ageung mangpaatna kanggo kanggo ngajembaran pangaweruh kanca FBS. Namung komentar nu spontan, heureuy, atanapi ukur 'ngaramekeun' ge, teu sawios. Etang-etang ngaraketkeun hubungan emosi di antawis kanca FBS. Kacontoan kamari waktos ngariung di Unpad. Da tos biasa tea silih komen, silih jempolan dina ieu lapak, pas tepang teh langsung conggah, padahal anyar pinanggih. Namung tangtos, nu dipiharep mah langkung seueur komentar nu “bergizi” tibatan komentar nu dipapandekeun kana keprok tadi. Minimal aya tarekah nu daria ti kanca FBS dina nyurahan atanapi ngaapresiasi karya nu dibacana, nu diserat dina komentarna. Nu dipiharep, ieu lapak FBS teh aya mangpaatna. Sanes wungkul kanggo ngipuk sareng numuwuhkeun pangaresep kana ngarang fiksi (mini), jembarna atuh urang beuki nyaah kana Basa Sunda, tapi oge mangpaat pikeun panglipur. Da panginten aya nu daria pisan, maca fikmin teh, aya oge nu ngan ukur hayang manggih pangbeberah manah. Rupina teu aya lepatna. Kitu deui dina mosting fikmin, aya nu keyeng hoyong midangkeun karya nu tiasa ngahontal ajen sastra, aya oge nu ukur hayang babalagonjangan. Mangga teh teuing, asal jiga we heula. Da nu tos kantenan ngacapruk pisan mah dipupus ku admin.
16 jempol

Godi Suwarna: :"Aya sawatara SMS jeung nu nga-inboks ka sim uing, nu kasigeung ku ieu kintunan ti Ang Tatang Sumarsono. Cek uing, teu kedah teras pundung teu nyerat komen, komo pundung tina ieu lapak mah. Ieu kintunan anggap wae ngingetan deui urang, kana tujuan utama perkomenan dina ieu grup, nu di luhur tos debeberkeun panjang lebar. Da uing ge kalan-kalan sok kajongjonan heureuy, kitu deui Ang Tatang-na ku anjeun. Tapi, lain hartina komen-komen teh kedah nu 'berbobot' bae, nu matak kerung ka nu maraca. Tiasa bae didugikeun bari heureuy asal nyambung kana karya nu dikomen. Tos opat taun sim uing sok jeceh tur alewoh dina FB. Kabeh komen ku uing sok dibalesan, nepi ka taya nu ngomen deui. Da cek uing mah, nu ngomen teh pasti hayang direspon. Cek pikiran jeung hate uing,teu sopan ngaranna lamun urang teu males komen ti batur. Tah, sanajan cek Ang Tatang kreator teu kudu jeceh jeung alewoh, ah uing mah rek jeceh jeung alewoh we. Da malesan komen teh, lian ti nu disebut di luhur, oge itung-itung latihan nembrakeun rasa jeung pikiran dina kalimah. uing mah rek nurutan pangarang Inggris nu gawena nyieunan kalimah sapertos nu didongengkeun ku Ang Tatang..."
15 jempol

Godi Suwarna: :"Haruuuh, edun nian dekh...!! Teu kapikir difikminkeun. Padahal kungsi ngolebat letah-letah kitu teh, dina sajak Malaria Tropika II. Geura, yeuh...: MALARIA TROPIKA II Uing ningal Acép Zamzam melak sajak dina buuk Nanging geuning nu ngacambah mung ukur majalah gosip Nu ngarumbay kana biwir balaréa. Di Tasik majarkeun Rék aya batu nu ngabaris ‘na keretas. Mangpirang Babah nyarumput dina gudang séwang-séwang Geuningan teu aya mobil nu ngabebela. Nu katémbong Mung bandéra beureum bodas nu rawék dina tihangna Sareng orok nu gumuruh ngantri susu di jalan Haji Mustopa. Sareng Jepang nu ngabring Ka Sukamanah. Duka teuing Manah saha nu keur suka Uing mireng Acép Zamzam maca kanpas Dina sajak. Soantenna janten létah warna-warni Nu manjangan ti Cipasung, ngaléor ka toko Jogja Milari minyak kalapa nu tos janten haleuang Évi Tamala Létah nu teras manjangan nyarengan bank nu keur ngabring Néangan tukang kiridit. Létah nu kalah murungkut Payuneun kantor pulisi. Hawatos. Da geuning sagara keusik Ngepung cepil urang Tasik, saparantos lagu dangdut Teu kénging dijarogédan Di Karanggedang, uing mireng Acép Zamzam Tapi teu ningali sajak. Dina kanpas tos teu aya pais lauk Printer laser sareng Gusdur. Nu nyelengseng ti dapurna Mung kantun Sidang Kabinét ngabahas perkawis sajak Nu undak teras-terasan. Ari Acép kalah anteng ngagambar Mar’ie Muhamad ku cisoca nu ngadadak ngagelebug Tina koran satumpukan. Kantenan, Kidung teras Kapidangdung barang terang Bung Harmoko Janten jalma alit pisan. Langkung alit Manan cinggir wayang golék Nu ngajoprak ‘na kotakna (98)
15 jempol

Is Tuning: Punten, ceuk paribasa-na ; sanes mapatahan ngojay ka lauk, mapatahan ngapung ka papatong, atawa mapatahan nodong ka garong. sanes .. Mun misalkeun urang ngadamel Fikmin di lapak ieu, pastina gé nungguan aya nu komén. Sakapeung sok lieuk deui-lieuk deui. Nepi ka beuheung asa sosonggéteun. Ramo gé asa bareuh mencetan tombol bari jeung teu puguh nu dijeuleu. Mun teu aya nu komén-komén acan pasti aya rasa hanjelu na harigu. rasa kuciwa na jero dada, asa teu dihargaan, asa teu boga batur. Rék ngomén batur gé jadi teu sumanget sabab na jero pikirna ujug-ujug ngajanggélék suudzon "batur gé teu daékeun komén kana karya urang, embung lah ngoménan batur.." Pan ngadamel Fikmin téh saméméhna tangtos mikir heula, teu asal pok. Ngarangna téh boa bari bari gogoléran, bari gawé, bari ngasuh budak. Malah mah datangna ideu téh keur nempo kajadian naon baé, boh keur dina angkot, keur ngiuhan jeung sajabana, Tah, lamun aya nu ngomén ka status urang téh, pasti aya rasa bungah. Padahal komén-na mah loba nu teu pira eusina, misalkeun ukur nga "heu-heu". Kukituna, mun urang ngomén téh sarua jeung méré kabungah ka batur. Tah, kukituna, ngoréhan pahala mah kumaha wé carana, ku cara nu sederhana, nyaéta ku basa. Teu pira.. Saéstuna, ngomén sareng ngajempolan téh ngarupakeun ibadah.. heu heu ..
14 jempol

Ba’da Bubat

Ku Yusef Muldiyana II

Sanggeus kulawargana tiwas waktu Perang Bubat, tileuleutik neupi ka gedé, saban poé Wastu Kantjana ngasah bedog jeung diajar silat, sangkan bisa males pati , nyecebkeun rasa nyeri ka Gajah Mada ; jalma jahat ti Karajaan Majapahit. Mangsa déwasa, Wastu Kantjana mingpin pasukan miang ka wétan, néang Gajah Mada. Barang amprok jeung Gajah Mada nu geus rempo, janggot, kumis, buuk geus barodas, Wastu Kantjana maréntahkeun anak buahna pikeun mulang deui ka kulon ayeuna kénéh. “Naha juragan ngajak uih deui, sanes bade males pati téa?” Ceuk salah saurang prajurit. “Anteupkeun wé lah, geus kolot, sakeudeung deui ogé paéh sorangan” Témbal Wastu Kancana.

Koméntar kana ieu Fikmin:

Godi Suwarna: :"Asa tanggung fikmin nu ieu mah. Aheng henteu, jeprut henteu. Kakiatan Gus Yusmul mah taya sanes iwal ti ngajeprut, kalan-kalan jeprut bari aheng oge..."
Jojo Johari: Pasti marulihna ka Taman Sari. Duka upami nyimpang ka Dago heula? ..heuheuheu ..hareueueuh?!
Maman Gantra: Tuh, pan? Geus nyebut-nyebut paeh deui?
Irman Dimyatie: :"Gajah Mada mah paehna ge dicoco sireum..."
Yusef Muldiyana II: Maman Gantra kunaha kitu ari nyebut-nyebut paeh? Jojo Johari hareueuh. Irman Dimyatie sireum kararangge panginten nya?
Irman Dimyatie: :"Muhun eta pisan. Duka kumaha uing mah, unggal ngadenge ngaran Gajah Reuneuh... eh Gajah Mada sok nyel we nafsu. Teuing pedah uing urang Sunda atawa uing turunan langsung Sri Baduga Maharaja... teu apal. Mun ngadenge ngaran Hayam Wuruk, sok langsung inget kana Fried Chicken, antukna digares we daging hayam teh bari ngabayangkeun ngadahar raja jawa nu hianat baheula."
Ki Hasan: Aya sakedik, 'miang ka wétan', laju 'mulang ka wétan'. Timana indit? Balik kamana?
Bibie Dayank: ngulibek panginten Ki Hasan,, hihi ,,
Yusef Muldiyana II: ka kulon maksad na mah Ki Hasan Sanggeus kulawargana tiwas waktu Perang Bubat, tileuleutik neupi ka gedé, saban poé Wastu Kantjana ngasah bedog jeung diajar silat, sangkan bisa males pati , nyecebkeun rasa nyeri ka Gajah Mada ; jalma jahat ti Karajaan Majapahit. Mangsa déwasa, Wastu Kantjana mingpin pasukan miang ka wétan, néang Gajah Mada. Barang amprok jeung Gajah Mada nu geus rempo, janggot, kumis, buuk geus barodas, Wastu Kantjana maréntahkeun anak buahna pikeun mulang kakulon ayeuna kénéh. “Naha juragan ngajak uih deui, sanes bade males pati téa?” Ceuk salah saurang prajurit. “Anteupkeun wé lah, geus kolot, sakeudeung deui ogé paéh sorangan” Témbal Wastu Kancana.
Iwan Hanjuang: ka salapan euy,jempol lah.
Yusef Muldiyana II: Kang Iwan , ke aya bonusna

Ngeunaan Ieu Naskah:

Medal: 17 Fébruari 2012 00:11:18
Komentar: 11
Jempol: 18
Format: Tos Luyu
Revisi: Ieu naskah tos direvisi ku pangarangna: 17 Fébruari 2012 19:58:14
Postingan ieu naskah dina Facebook (klik di dieu)

Naskah lianna karya Yusef Muldiyana II