Ku Yusef Muldiyana II
"Nyai Sumbadra, bojo akang" Ceuk Radén Arjuna ka garwana di ruang fitnes direjeungan ku minantuna, Néng Déwi Utari. Néng Déwi nuju dikantun dambel ku Abimanyu, syuting infotinmen di TV lokal. "kaulanun Kakang" Tembal Sumbadra. "Kakang mios, Nyi" Ceuk Arjuna deui. "Mangga Kakang, ati-ati nyetirna ulah balangah, bilih nabrak, engké mobilna reksak.
Di tempat séjén, barang Radén Aria Bima ngaluarkeun Harleyna, torojol Gatot Gaca "Hemmm. Béh, cik ngeclok heula dua puluh rébu mah, hayang ka warnét yeuh, bongan modem teu jalan." Ceuk Gatot Gaca. "Heeem, ménta weh ka nyokap manéh, tuh aya di sisi kolam renang keur maén catur dihurup ku Mang Nakula jeung Sadéwa. Barina rék naon ka warnét?" Ceuk Bima. "Puguh geus teu sabar hayang ngirim Fikmin" tembal Gatot.
Di tempat séjén, bada Magrib, Arjuna markirkeun mobilna, hareuoeun imah Monika, randa béngsrat bintang sinetron anu keur meujeuhna sohor. Arjuna reuwas lantaran di imah randa éta paamprok jonghok jeung Bima. "Aéh geuning aya Kakang Aria didieu?" Bima sarua reuwas "Hmmm, aéh geuning manéh, Jenéd?" Lajeng Arjuna ngaharéwos ka Bima "omat kakang ulah wawartos ka Nyi Sumbadra, aya kula didieu" "Moal Néd aing janji, aing moal bébéja ka Si Subadra, tapi maneh oge tong nyarita ka Aceuk Arimbi aing aya didieu"
Balik ti imah Monika, Aria Bima nyimpang ka imah Srikandi, garwa arjuna nu lian, ngabéjakeun yén manéhna mergokeun Arjuna keur apél di imah randa. Kapagétonakeun, Bima meunang sms ti Arjuna "nyaaa, Kakang mah sok comél, ih" "Hemm, aing mah comél sotéh ka Srikandi, lain ka Subadra" Bima males sms.