Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Buta Saba Kota

Kénging Yusef Muldiyana II
Dipidangkeun dina lapak 16 Fébruari 2012 07:46:10

Aya buta di sagara, ngajugjug ka Pulo Jawa. Ayeuna geus di Jakarta, ngagujrudkeun ibu kota. Tungkul ka Gedong DPR. Kenténg-kenténg disakuan. Neureuy buleud korsi sidang. Pajabat patingkocéak, da ceulina disintreukan. Unggal dompét dikoréhan. Buta merekis ku duit. Dorodod disebrot pélor. Teu busik bulu salambar.
Buta pada nutur-nutur. Tuluy nyusud Tatar Sunda. “Waspadaaaa, aya butaaa..!” warga Sunda ngagaroak. “Jangkungna rébuan méteeeer?” ditémpas ku nu séjénna. Ngagimbung ti mana-mana. Hayang nyaho rupa buta. Buta niup Gedong Saté. Kenténgna jadi beresih. Tuluy ngodok jero gedong. Pangeusina ditambrukeun. Dipulas ku warna-warni. Dompétna kabéh dikerid.
Buta nangtung di Gasibu. Dompét tuluy dibagikeun. Nu nyamos teu nanggeuy gado. Meunang kenténg gedong agréng.

Komentar (47)

Godi Suwarna
:"Weiiis, benten nu ieu mah, yeuh...! Basa Sundana ngawirahma pisan. Ari eusina mah tos pasti kana ngajeprut...! Sae, yayi..."
Lenny Magdaleni
Hahahaha... Abdi mah nanggeuy gado Kang. Da teu kabagi...!
Yusef Muldiyana
Kang Godi Suwarna, @Maman Gantra haturnuhun tos mamaparin jempol. Waspada bilih aya jempol buta, hahaaa.... tos kenging udat edit unggal usik muka kamus tur tataros kanu ahli sapertos Kang Godi, Kang Dadan, tur Ki Hasan.
Maman Gantra
Wah, Kang Yusef: Sing atos-atos. Boa-boa ieu fikmin masterpiece salira. Bilih sesah ngungkulannana! Hahaha... Bahasana beres, bengras. Lancar norolang. Bari, eusina nyigeung kaayaan urang kiwari. Aktual pisan. Sim uing satemenna sok rada hemeng, sanaos remen oge nyanyahoanan: Di luar sipat salira nu resep guyon, saleresna mayakpak kaparigelan serat sinerat sareng jiwa nu rancingeus. Asak jeujeuhan, apal kana kaayaan jaman. Ku kituna, dina enjing nu lenglang ieu, sim kuring seja nyanggakeun jempol -- kalih ramo sanesna. (Mung, omat, curuk mah ulah. Margi, pan kangge atahiyat?). Ku kituna deui, sim kuring ngantos fikmin-fikmin petingan sanesna. Pamugi langkung mencrang ti dieu. Amin. (Mugia bae sim kuring sanes bagean ti nu nanggeuy gado. Ukur kabagean kenteng tina gedong agreng. Hehehe... Heded pisan endingna, Kang!)
Rohaendi
wah ieumah edun pisan eung, kacida rohakana, ngacacang lamunan, logika pabeulit jeung imaji, waas pacampur paur. buta teh saha atuh heuheu?
Yadi Fathur
hahahahah... hayu ah urang keprokan..."Hidup Buta"
Entjep Sunardhi
Buta saba kota, ti ibu kota ka tatar sunda, poho kana wiwaha, pada ngarogahala, tapi masih digjaya, saheulaanan. Jempol akang kasanggakeun ... !
Yusef Muldiyana
Lenny Magdaleni ke sugan aya keneh kenteng sesa nya sabar we heulaanan, Maman Gantra aduh meni panjang yeuh komentarna tara-tara tisasari. Haturnuhun, kenteng teh sae perlambang papayung paranti ngiuhan ati. Rohendi Pandeglang, Buta nembe ukur aya dina ubun-ubun. Yadi Fathur Berkata muhun urang keprokan siga ngeprokan Persib.
Godi Suwarna
:"Percanten..! Yusef Muldiyana II mah upami aya kapalay teh tara kagok asong. sok teras bobolokot. Da kitu sabda Mahaguru Wahyu Wibisana oge. Mun geus abcrub tong kapalang bobolokot, saurna. Fikminer nu palay majeng karyana tangtos kedah 'bobolokot', maca karya fikmin pentingan, Sunda, Enonesa, Inggris. Macaan dokumen di ieu lapak, ngabandungan kamadang para saehu. Tapi, aya oge calon fikminer nu cengeng. Sakali mosting karya, heg teu aya nu ngomentaran, sok teras ngarasa disapirakeun, nuding nu karyana rea dikaromen yen eta teh balad-baladna wungkul, tuluy pundung teu ngarang deui. Kawas nu teu nyaliksik diri, ngukur kana karya sorangan. Padahal, boro-boro pangarang anyar, dalah sim uing ge nu tos puluhan taun ngarang Sunda, apan mikmin mah diajar deui. Kalihna ti eta, apan komen jeung jempol mah lain tujuan utama ngarang. Di ieu lapak ge aya fikminer nu hade karanganana tapi langka dikaromen, dijarempol da fikminna sok 'bareurat' tea. Tapi da angger we anjeunna ngeureuyeuh, ngarang, nepikeun, ngebrehkeun, kereteg hatena...."
Yusef Muldiyana
Haturnuhun Kang Godi Suwarna, komentar akang mangrupikun enteung pikeun kuring. Tangtos ari bobolokot mah da ti saprak abdi lebet ka grup FBS kuring teu mandi-mandi. Nganter bojo ka pasar, fikimin deui, ngantar pun anak sakola fikmin deui. Malih abdi mah susulumputan ngadameul fikmi teh sok inggis digebes ku pun bojo. Asa baheula keur mimiti ngaroko, sumpat-sumput sieun kapergo.
Yusef Muldiyana
Maman Gantra komentarna kawon panjangna ku Kang Godi.
Maman Gantra
Kang Prebu Godi, nu karaos ku sim kuring: Ngiring ngomentaran ge ageung mangpaatna. Lian ti silaturahmi teh, oge ngorehan rasa sareng basa. Hartosna, nyeukeutan kaparigelan nyerat atanapi ngungkabkeun kereteg hate tadi. Sanaos, rumaos, sok rada ngacapruk. Hehehe... Tos watek panginten, nya? (Ongkos saur pun guru ge: Ngacapruk itu indah. Malih sabagean tina iman. Hehehe... Wilujeng enjing. Pamugi salira panjang yuswa, sehat, sareng teras tiasa ngiring nyegerkeun basa tur sastra Sunda. Amin).
Maman Gantra
Kang Yusef, wios kawon panjang komentar mah. Asal ulah kawon panjang nu sanesna bae...
Yusef Muldiyana
Maman Gantra kaci8pta nya sibuta anu sanesna saageung kumaha, eh tapi da teu apal eta buta teh jinisna naon nya, istri atanapi pameget?
Ki Hasan
Hehehe. Numatak kitu Kang Godi Suwarna, sakapeung aya oge nu protes. Kunaon naskah si dadap dikomentaran, ari si waru henteu. Padahal duanana paranjang. Uing jadi bingung ngajawabna. Ceuk uing teh palanggeran mah rujuk wae nu aya dina papagon (dokumen FAQ sareng papagon FBS). Ari komentar mah, biasana random, kumaha nu katewakna. Da teu moncongok hiji-hiji dititenan ku admin teh. Gumantung kana waktos tea. Sakapeung, upama aya nu kirang saluyu teh, sok diangon heula, bilih ukur kawenenhan. Upama tos sababaraha kali nembe dikomentaran. Tujuanana mah taya sanes, sangkan aya inisiatif milari ku nyalira.
Godi Suwarna
Ki Hasan :"Ayeuna mah fikminer tambih seueur bae. Meh teu katuturkeun lantaran postingan jadi rea pisan. Ku kituna, sim uing miharep ka para fikminer nu tos lami icikibung di ieu lapak, supados tiasa nuyun fikminer nu arenggal. Da upami kedah teras dibandungan ku sim uing mah tobaaat, teu sanggem. Kalihna ti eta, perkawis kahengker para fikminer nu arenggal teh saleresna mah kitu-kitu keneh; ejaan, ngetik, plot jst. Tiasa dilereskeun ku para 'senior'. Ayeuna mah sim uing mung bade ngomen sareng ngajempol fikmin nu leres-leres sae cek ukuran sim uing. Wawuh atawa teu wawuh, nu hade mah pasti dikomentar, disumangetan. Nu teu acan dikomen, dijempol, mugi-mugi we ulah teras pundung. Mugi-mugia sing teras meuseuh diri..."
Entjep Sunardhi
Nu pundungan can cukup umur, nu cengeng nu beuki leweh, nu bageur mah pasti nanjeur ....
Yusef Muldiyana
Fikmin-fikmin sim kuring oge nya kitu tea , anu ieu mah dikaromentaran, anu itu mah heunte, atu eta mah mung ukur diaracungan jempol. Didinya kuring sok nalungtik diri kadang-kadang sok kapanggih naon pangna hiji fikmin uing teu dikomentaran, naha tema kirang menarik atanapi garing,naha panjang teuing janten teu siga fikmin. Abdi sok bingah pami aya anu ngawartosan kakirangan-kakirangan dina fikmin abdi sok pada dibebeunah ku dulur-dulur nu tos lami anclub di sastra sunda sapertos Kang Godi Suwarna, Kang Nana Sukmana, Kang Dadan Sutisna, Ki Hasan, Nunu Nazarudin Azhar, Lies Tjandra Kancana Sudarma, Nyai Endit, jeung sajabana. Malih Kang Nana mah masihan wates ka sim kuring dumeh anjeunna tos tilu kali ngaropea fikmin abdi, "kahayang mah ulah nepikeun ka tujuh kali" saurna. Namung ayeuna Sim kuring gaduh strategi kumaha carana sangkan fikmin dikomentaran. Kieu contona, kahiji kuring ngagentraan Maman Gantra "Kang Maman wayahna komentaran fikmin uing, kudu daek mun teu daek dikadek!" Tuluy ka Lenny Magdaleni cikan ngomentaran fikmin abdi nebgt, ke dipasihan kenteng. Aya anu alimeun eta oge namina Tya Setiawati, "isin ah ku Kang Godi", saurna.
Yusef Muldiyana
Kang Entjep Sunardhi haturnuhun tos ulubiung. :)
Iwan Hanjuang
akang teu komen yeuh,moal nyebut heded deuih,hampuranya Lur..xixixixixixi
Yusef Muldiyana
yeeh ari Kang Iwan Hanjuang aya ku Heded, justru simkuring ngantosan komen ti salira
Lenny Magdaleni
Pokona mah fikmin Kang Yusef. Seger tapi ateul..hehe
Godi Suwarna
:"Taaah, najan uing nyobat jeung Yusef Muldiyana, tapi lamun uing teu resep kana fikminna mah nya antep we, tara dikuman-dikomen, tara dijumpal-dijempol. Sabalikna, lamun hade cek ukuran uing, pasti uing ngomen, ngocoblak..."
Iwan Hanjuang
Bener tah ceuk Lenny Magdaleni.. seger keur meujeuhna "gumateul" hahahahahahaha
Ki Hasan
Tah muhun saena mah kitu Kang Godi Suwarna, kedah silih geuing papada kanca wae. Da puguh kana ngarangna mah uing ge rumasa, can lelengkah halu - lelengkah halu acan. Jaba arang deui nyeratna ge, da ngorehan ideu teu jebul wae. Digebruskeun janten admin ge, sanes pedah aya kamaheran, eta mah puguh dikunclungkeun ku Kang Dadan Sutisna we, sina kekerebekan.
Lenny Magdaleni
Kang Iwan Hanjuang, Maksad abdi mah... Sok ateul mun teu acan maos fikminna.
Yusef Muldiyana
Neng Lenny Magdaleni keheula maksadna ateu teh kumaha? Kang Godi Suwarna pantesan aya 23 fikmin abdi teu dikomen teu dijempol ku akang, teras aya 8 anu jempol wungkul anu lianna mah dijempol sarteng dikomen alhamdulillah. Kang Iwan Hanjuang gumatel teh nuju mejehna aratel nya? Ki Hasan nuhun.
Iwan Hanjuang
mehen neje mejehne gemetel hahahahahaha pis ahh
Moeflich Hasbullah
Kang Godi Suwarna, sae pisan katerangan ti Ki Guru. Balaka bae, sim uing oge gede hate di FBS teh. Tos 26 tahun nyerat artikel ti semester II keneh, nu munggaran dimuat di Gala tahun 1987, nembe ayeuna nyobian ancrub kana Basa Sunda. Karesep mah aya, tanaga kurang, komo pami ras kadiri sanes Sunda pituin, pun bapa di sabrang, Bugis asli, sangsara ku perbendaharaan kecap Sunda. Tapi sok kabita pami maca novel sareng carpon Sunda sanajan kecapna 'ararasing.' Komo, sawatara lima taun katukang, kantos maca puisi-puisi pangersa. Waaahh ... eta puisi. Eddun suradun. Asa maca karya aki-aki buhun, tapi apal Godi teh anom keneh. Harita tah terang nami Godi Suwarna teh, kataji pisan. Manggih fikmin, nu kudu pondok, asa manggih deui tanaga. Ka FBS abdi lebet nyalira sanes dilebetkeun ku batur. Namina diajar, kasalahan tangtos pabapalak, eh gening sanes kuring wungkul, nu hareded ge aya keneh salahna sareng kirang mernah mah. Seuer fikmin eddun ngan nyeratna acak-acakan, kaapikan nulis teu diperhatoskeun. Inti na mah, fikmin teh wahangan keur diajar sarerea. Aya pengersa tambih euyeub. Kalayan daria, kuring nganuhunkeun ka sadayana, tim admin sareng dulur-dulur saparakanca: Kang Nazarudin, Kang Dadan Sutisna, Ki Hasan, Kang Nana Sukmana, Kang Yusef Muldiyana II, Kang Maman Gantra, Kang Dadi Arya jrrd. Sekali Merdeka tetap Merdeka ..!!!
Ki Hasan
Nu katoong ku uing mah, Kang Yusef Muldiyana II teh beunghar ku ideu. Duka teuing naon katuanganana. Piraku langir mah sugan. Ngarah ideu-ideu bisa liar jiga Kang Yusef, aya hadena ditalungtik, naon nu dipuhitna, naon katuanganana geura. Dina tilu naskah nu pang anyarna, nu katinggal pisan mah, tambah beres dina ngalarapkeun tanda baca sareng tatabasana. Jigana ladang ngotektak tea. Da masalah teknis mah kapan bisa dititenan tina naskah-naskah pangarang nu tos jadi, jiga Kang Godi Suwarna, Kang Tatang Sumarsono, Kang Dadan Sutisna, Kang Deden Abdul Aziz, Kang Darpan A Winangun, Kang Hadi Aks, Kang Nazarudin Azhar, sareng nu sanesna. Atuh bahan rujukan oge kirang kumaha, kamus disayagikeun, tatabasa kantun diunduh, buku elektronik tos aya sababaraha judul. Kantun ngaliarkeun ideu, sareng prungna mikmin.
Yusef Muldiyana
@Ki Hasan abdi sering kieu, leres naon anu disaurkeun Kang Nana Sukmana, barang tos di orbitkeun nembe terang lepatna, rush teuing tea panginten. Kirang dipeuyeum heula saur Kang Godi sareng kang Dadan tea mah.
Nana Sukmana
Raka Perbu Godi Suwarna, Ki Hasan, Kang Maman Gantra, Ang Yusef Muldiyana II : Kantenan, leres anu dicarioskeun ku Raka Perbu téh. Beuki dieu beuki seueur anu arénggal. Atuh tinangtos seueur karya anu teu kakemot jalaran ku murudulna tea. Saban dinten antawis 15-20 karya. Olab upami teras dikomentaran. Bari apanan para admin téh henteu salamina manco di payuneun layar monitor. Janten, leres sur Ra Perbu, ka para "senior" tos waktosna kanggo silihgeuing, utamina ka nu nembe mucunghul. Mangga nyanggakeun hal-hal teknis mah digeuing baé. Sim uing sabada dibenum janten admin, dugi ka dangat ieu badé ngadamel fikmin téh henteu tret bae sok sanaos ari bahan golondonganna mah parantos aya. Duka kumaha, da barang muka FBS katut web-na sok rada garéték upami ningal seratan (anu alanyar) anu raméték kénéh. Seueur lepat ngetik sareng tanda baca. Sim uing sok kajongjonan, dugi ka nyerat téh henteu trét waé. Sok sanaos sim uing henteu diburuhan, henteu kenging gajih, namung sim uing kacida bungangangna upami panggeuing ti sim uing "didaréngé". Kahoyong téh, ari hal-hal elementer mah teu kedah hayuh waé digelendeng. Ku sakali gé kedahna mah cekap. Namung nya kitu, aya nu ngadéngé aya ogé anu norék. Ah, teu langkung baé éta mah, da kanggo anjeunna ieuh. Mung sakawitna, sim uing mah kitu peta téh awahing ku nyaah ka ieu lapak. Sim uing hoyong pisan (idealna panginten) sadaya fikminer FBS tapis metakeun jurus-jurus dasar. Prah sadayana.Upami parantos kitu, apan anu bakal diasah téh kantun eusina, kualitasna. Janten museur. Papadaning kitu. Sim uing parantos jangji ka diiri sorangan, salami aya nu anyar (anu lami oge ari lepat baé mah) bakal tetep céréwéd, da hayang ningal sadaya fikminer FBS nyangkem jurus dasar anu sami. Raka Perbu, sim uing mah anggap baé gulang-gulang nu ngajaga kelas dasar, sabuk bodas. Upami parantos naraék tingkat, ku sim uing disanggakeun ka admin nu sanésna, Ki Hasan, Mang Dadan Sutisna, Mang Nazarudin Azhar. Anapon tugas Kakang Perbu mah meuseuh anu badé naraék kana sabuk hideung, Dan I, ssté. Kitu manawai. Tah, ku jalaran kitu, anggota FBS anu parantos naraék tingkat, kahadé ulah lali kanggo népakeun élmuna ka adi-adi tingkatna. Ku cara sapertos kitu, moal aya fiminer FBS anu pundung lantaran ngarasa teu dibagéakeun. Mangga bagéakeun ku sadayana. Simbeuhan ku kaweruh anu tos kacangking. Tanaga, emutan, sareng waktos para admin téh kawatesanan pisan. Urang nurutan multilevel marketing wé. Prung ah. Badé ngaregot citéh panas heula. Tong sayogi dina méja. Kumplit sareng leupeut kalih gorenganana. (Pun bojo nembé ngalanggeor bari imut. Ngartos pisan kana karesep carogéna. Nuhun, Geulis. Mugi Allah nangtayungan sareng mirido ka salira!)
Rudya Kuz
kedahna kang Yosef mah ngadamel deui grup nyaeta fiksi maxì,mini tos kitu komo maxina,hehehe ide2 na uptodate terus,abdi pangpayunan kang nu ngadukung hehe
Nana Sukmana
Halah, sim uing kalah ngadon ngadabrul. Hilap teu acan ngajempolan karya Ang Yusef. Sing beunghar, sim ung cumalimba ningal sareng maca tulisan Ang Yusef. Tétéla nérap sareng didéngé uing céréwéd téh. Seratan nu ayeuna, sakumaha nu disaurkeun ku Kang Perbu, éstuning rapih. Genah ka nu maca. Keun, ari perkawis eusi mah, urusan Raka Perbu. Hébat, Ang Yusef! Nyaan, henteu heuheureuyan Aang mah. Nuhun!
Yusef Muldiyana
Kang Nana Sukmana heuehueu aya sabuk bodas siga karate, panginten Kang @Godi parantus sabuk hideung Dan 10 heuheuy... Rudya Kuz Fiksimaxy mah atuh novel tea panginten hehe... Nining Mulyati abdi meser pruyem sakilo. Yanti Sri Budiarti nuhun jempolna.
Yanti Sri Budiarti
he he Teu acan kabujeng komen, si Raden kabujeng gugah...:) Hebat fikminna Kang Yusef..! Sigana ngalap berkah tina banjir tea nya, janten banjir ku ideu...he he
Yusef Muldiyana
Teh Yanti Sri Budiarti pupuja ning Agus, eta teh banjir anu kalima kali di rorompok namung kamari paling rosa. Jojo Johari geura hareuuh atuh. Abah Sarjang, Apoedy Sarah Ihsan, Samidjo Dwidjosukarto, Cep Simi Inda Nugraha Hidayat Dado Tisna, Toni Lesmana, Puri Kania Pramanik War kadarieu atuh
Jojo Johari
Horseeeeh! ..heuheuheu ..hareueueuh?!
Hadi Aks
Hahaha...asik, Ang! Nu ieu mah aya undakna tina sakadar ngajeprut. Mung uing mah asa 'leungiteun' ari fikmin Aang semu daria teh! hehe...
Yusef Muldiyana
Jojo Johari tah geuning hareueueuh datang. Kang Hadi , maosna asa bari ngadangukeun lagu Syukur kitu? "dariakin ku teguh......"
Hadi Aks
Hahaha....
Yusef Muldiyana
Kang Nana, Kang Hadi, Kang Hawe, @Kang Iwan, Irman , Kang Rd Okke Chandra, euning nyipta fikmin anudaria mah teu tiasa sadinten dua dinten ngotektakna, namung abdi soki ateul mosting anu saayana kereteg hate, jadi maklum lamun ujug sok balelol hahaha....
Mahpudin
manawi teh si buta tukang pijit ieu teh... heuheuheuheu...
R Okke Chandra
hahahahaha sae kang sae... lamun dina aliran lukis mah , aliran akang teh sureallis heu heu heu
Yusef Muldiyana
Aki Apoedy Sarah Ihsan eta mah buta lolong tea paninten, Rd Okke Chandra kade bilih dompet dikerid buta. Deden Rengga lain ukur ngajempolan wungkul, komen atuh komen tuluy mikmin. Dhipa Galuh Purba mana atuh fikmin na piraku ngan sabelas, siga anu lebar ngaguar ideu, teu cara dina media hahaha punten ah pissss...!
Cep Simi
Kadarieuuu! Aya buta ngabagi dompet...
Yusef Muldiyana
Cep Simi nuhun. Babas Bastian Noerzaman Sāgara, Tini Martini, Budi Rahayu Tamsyah kadieeeeeuuu