Malioboro kapeutingnakeun. Nu ngamen piligenti asup ka warung tenda. Es teh manis geus beak dua gelas. Can waka pesen dahareun, da ngadagoan manehna. "Hapunten elat, nembe di rumah sakit aya oprasi heula," ceuk manehna. Dokter manehna teh, ngan resep kana mengbal. Ditawaran dahar teu daekkeun, carekna rusuh kudu ka rumah sakit deui. "Ieu we atuh tampi cek, tiasa dicairkeun upami tos yakin kenging," ceuk kuring bari ngasongkeun amplop. "Mangga. Enjing abdi bade nurunkeun pamaen cadangan," cenah. Sabada luak-lieuk manehna pamitan. Kuring ge buru-buru muru ka hotel da barudak paresen nasi kucing. Angin peuting nyulusup kana awak. Karasa tirisna. Dua poe ti harita, aya warta dina "Kedaulatan Rakyat", judulna gede pisan: "Suap Melanda Sleman Yunior". Kuring nyerengeh. Salak pondoh pamere manehna karasa beuki amis. Kareueut. Tadi sore, memeh rombongan Persib Yunior mulang ka Bandung, aya pagawe RS Bethesda nganteurkeun salak pondoh sacarangka.