Tiap isuk, nagog bari tungkul diburuan. Ngahaja moyan.
Cengkat téh mun dampal suku geus karasa singsireumeun
atawa tuurna cangkeul.
Mun tengah poé, keur meumeujeuhna panas éréng-éréngan,
mindeng nangtung ditengah lapang. Moé manéh. Dua Leungeunna
sidakep, tuluy tanggah bari peureum. Enya bari peureum, da bari
beunta mah sérab.
Komo mun nempo aya nu dudurukan, atawa aya imah nu kaduruk.
Teu kaop. Ujug-ujug nyampeurkeun. Tuluy diuk andiprek bari nyuuh.
Siduru.
Kitu jeung kitu wé gawéna téh. Geus aya kana mingguna.
"Kunaon manéh téh kitu peta ?" Aya nu kungsi nanya. Kerung.
"Otak uing beku," pokna kalem.