Ku Neni Geo Albanjari
Sababaraha kali meunang sms ti nomer nu teu wawuh, pernah dijawab sakali, tuluyna diantep. Nangnengnong…! Sms datang, breh nomer biasa nu sok ngasms salila ieu.” Deudeuh teuing bageur, tunduh? nundutan wae kuliah teh!”, kuring luak lieuk nengetan babaturan, saruhud ngabandungan dosen gandang, paporit mahasiswi.
Geuwat ngasailenkeun hape, “Muhun, wengi begadang, ieu saha?”.
Rada lila teu aya waleran. Derrrdddd, hape ngageter,“ Masih tunduh?!”.
Kuring cenghar, ngawaleran smsna, “ Alhamdulillah damang, nuhun smsna, saha atuh anjeun teh?!”, hate tambah panasaran.
Derrrdddd, hape ngageter, hate milu ngageter,“ Nuhun tos cenghar mah, sabarnya! sakedap deui atosan kuliahna”.
Kuring ngahuleng, ngagerentes” Ah diheureuyan sakalian geura”.
“ Pami anjeun pameget bade saha wae, bade jiga kumaha, bade dijadikeun panutan hate!”.
“ Hahahah… enyaan, bageur?!”.
Kagok asong, dijawab,“ Enyaan atuh! Hayu urang pendak di taman, bangku katilu ti katuhu, sabada kuliah!”.
“ OK, lima belas menit saatos kuliah ayeuna!”
Di taman, bangku katilu ti katuhu, kuring ngembeng cipanon, neuteup manehna.