Ku Neni Geo Albanjari
Bhagawan Asteroid keur kakalayangan di angkasa, ngawang ngawang , rineh, norobosan mega ka mega, nu beuki lila beuki nyirorot ka lebah lemah luluhur. Para kuncen di bumi, pabuis riweuh, kabeh kabeh ngakuna menang wangsit ti Sang Asteroid, yen sakeudeung deui rek nibankeun dirina ka bumi ku kakuatan nu 1000 kali leuwih gede tibatan bom di Hiroshima, beja pabeja beja ka sakuliah dunya. Kaum kumawasa di Mumunggang Senayan, milu riweuh, ” Gawat dulur dulur si Asteroid cenah rek ngabeubeutkeun diri di lebah imah urang” . Ngadenge kitu sakabeh nu ngageugeuh Mumunggang Senayan moyeg ku hariwang. Gancang ngayakeun sawala penting jang kasalametan maranehannana. Beres sawala, sung song mikeunan sakabeh harta nu dipibogana, geus ngumpul meunang juh leuit, dibawa ku pupuhu kaum kumawasa, rek nego jeung nyogok Asteroid sangkan ngabolaykeun ngaburantakeun Mumunggang Senayan. Euweuh nego, komo angot nyogokmah, asteroid angger dina tujuannana, harta nu tujuh leuit ilang teuing kamana bareng jeung ngaleungitna pupuhu kaum kumawasa.