Fiksimini Basa Sunda

Update: 27 April 2012 20:40:07

Milari Pangarang

Statistik

Jumlah Mémber	2.543
Jumlah Fikminer	917
Jumlah Naskah	17.667
Jumlah Koméntar	193.030
Jumlah Jempol	268.468

Naskah Unggal Bulan

Bulan Séptémber 2011	1.533
Bulan Oktober 2011	2.339
Bulan Nopémber 2011	2.308
Bulan Désémber 2011	2.115
Bulan Januari 2012	2.148
Bulan Fébruari 2012	2.641
Bulan Maret 2012	2.966
Bulan April 2012	1.617

Naskah Populér

Kampung Bangsat
Ku Yusef Muldiyana II
605 koméntar, 145 jempol

I Miss You..!
Ku Godi Suwarna
349 koméntar, 111 jempol

Rampak Lodong
Ku Godi Suwarna
286 koméntar, 123 jempol

Ringkang Sang Dangiang
Ku Godi Suwarna
277 koméntar, 119 jempol

Lalakon Awon
Ku Godi Suwarna
253 koméntar, 106 jempol

Koméntar Populér

Godi Suwarna: SAJAK TI JALAN KA MANA ngémploh pucuk-pucuk entéh mulas léngkob jeung lamping nu keur dumeling sapanjang jalan rumangsang néang hibar langit beurang hawar-hawar, kahariwang dilaungkeun kawih leuweung sabot mipir jegir pasir jeung kaketir nangtang ringkang lalaunan angin rintih ngusapan léngkah guligah luang-léong ngitung tikungan kalah kérok balas nalék pulas haté halimunan balitungan antara was-was mun nyorang lelewang jungkrang jeung panggupay ti palebah mumunggang gunung panungtung padungdengan sabot méga katémbong beuki meuleukmeuk samar-samar nyidem hujan jeung guludug beuki jauh nyusud waktu bet kasarung satengahing kahayang nu pasulabreng antara ngajuringkang ka landeuhkeun, ka sisi talaga wening atawa rék terus nyusul jangjang julang kumalayang nilar sayang humandeuar ti tetelar ka tetelar nu horéng teu matak kelar kalah awor jeung geuneuk kelir karémpan ngalulungsar di totowang mépéndé rurungsing jantung nu gumuruh silantangan sanggeus ngasruk alimusa ‘na rerembet tegal mangsa beuki surti yén pucuk gunung panungtung ngancik dina sanubari ngan kari ngaragap diri nu mindeng ngaberung mangprung bari naker ieu ketak saméméh béakkeun hégak
20 jempol

Dadan Sutisna: Jungjunan, dina dunya jejaring sosial modél lapak urang, kecap téh teu béda ti kalakay nu dipalidkeun. Poé ieu katémbong kénéh mumbulna dina cai anu séah, isuk mah boa di mana. Jungjunan, dina awak anjeun, aya runtuyan kalimah kénging tekal-tekil para kanca, kenging uleng ngaragameneng, kenging nyongcay waktu—sakapeung dibarung ku kebul udud jeung kocék cikopi. Dina awak anjeun, rambay rupaning koméntar, nu beureumna nu hideungna, aya kalana élmu panemu balatak di dinya. Atuh lebar temen, mun anjeun tuluy kalaut taya tapakna, teu puguh di mana ngancikna, atawa ukur jadi abrulan huruf nu paburencay di sagara. Leres, béda jeung lanceuk-lanceuk anjeun (siga Nyi Novél, Jang Sajak, Ang Carpon, Aki Dangding, Uyut Wawacan, jsté), anjeun mah gumelar dina jaman nu sarwa bébas. Bébas nulis naon baé dina médiana sorangan. Najan éta kabébasan téh, sakapeung pagedrug jeung nu ngaranna prosés. Nanging teu kedah galideur, urang mah apan eukeur jeung terus ngawangun dokuméntasi nu weweg. Anjeun katut para kanca nu ngiring bumetah di dieu, urang apungkeun ka jauhna. Nepi ka hiji wanci, anjeun aya nu nalungtik, ku nu weruh disemuna. Geura wé, mun anjeun ngetik “Fiksimini” di Mang Google, urang téh tos aya dina réngking 5 tina 381.000*, tur sakedap deui gé popularitasna baris ngéléhkeun fiksimini basa Indonésia nu dina Twitter. Éta téh kumargi urang ngawangun dokuméntasi téa. Sakitu heula ti simuing, dipungkas ku “muah” tilu kali. * data kaping 24 April 2012, tabuh 02:14
19 jempol

Nazarudin Azhar: Kang Godi Suwarna, nu dimaksad teh termos es, atanapi termos cipanas? hehe.... Sim uing mah bade masihan ideu ka nu hoyong ngadamel grup dina fesbuk, sangkan grupna aya mangpaatna: grup RUMPAKA LAGU SUNDA (ieu penting pisan keur nu resep karokean lagu sunda, anggota tiasa mostingkeun rumpaka lagu kameumeutna kanggo nu meryogikeun, atanapi nyiptakeun rumpaka kanggo didamel ku musisi sapertos Kang Iwan Hanjuang). Grup HUTBAH BASA SUNDA (anggota nulis bahan kanggo hutbah jum'ah, hutbah idul fitri, hutbah nikah, sareng sajabina. Peryogi pisan kanggo nu biasa hutbah di masjid atanapi pangaosan, sapertos Kang Nana Sukmana, Kang Irman Dimyatie, Ang Ahmad Fawzy Imron, Ang Muhammad Shohiba Nu'man, sareng nu sanesna. Lian ti bisa ngeuyeuban tulisan pikeun bahan hutbah, nu nulisna ge pasti kenging pahala ti Gusti Nu Maha Suci. Tibatan unjang-anjing teu puguh karuh na fesbuk, sanes? ). Grup TALATAH KAYAS (eusina ieu mah tulisan nu kayas-kayas, jiga surat cinta lah. Tibatan nyarita kasar, asa mending nyarita nu romantis, upamana ti salaki ka pamajikan nu sarua resep fesbukan tapi keur pajauh, ti jajaka ka wanoja, atawa sabalikna, atawa ti nu anyar bobogohan terus hayang pamer, atawa nu hayang nyandung ka sasama fesbuker tapi teu bisa pok, dina grup ieu mah bisa laluasa berkayas ria. Tangtos pangarang sapertos Malik Mift Malik, Dhipa Galuh Purba, Arom Hidayat, Nyai Endit, sareng nu sanesna, bakal haget janten anggota). Grup CICIH CANGKURILEUNG (ieu mah husus kanggo penggemar Cicih Cangkurileung, penggemar istri nu namina Cicih, atanapi kanggo penggemar Cangkurileung). Grup CANDA LAHAR (ieu mah husus pikeun humor kasar nu ditulis memeh dahar). Grup ORASI BASA SUNDA (upamina orasi kanggo anggoeun tim sukses pilkada, orasi pikeun mahasiwa nu rek demo, jst). Grup ASEP TOHIR (grup pikeun urang sunda nu ngaranna Asep sareng Tohir). Saleresna seueur pisan ideu sim uing kanggo ngadamel grup teh, namung teu sadaya kahayang kudu dianteur karepna. Ieu mah diserat di dieu teh mamanawian tiasa ngaideuan nu hoyong ngadamel grup di fesbuk. Ka saha wae nu bade ngadamel grup tina gagasan sim uing di luhur, kedah masihan royalti. Hatur nuhun.
18 jempol

Nazarudin Azhar: Kang Tatang Sumarsono, hatur nuhun pisan seratanana, mugia kamandang Akang tiasa kaaos ku sadayana, kanca FBS. Leres, perkawis komen saena ngandung "nilai plus" sakumaha kasauran Akang. Tujul kana ajen karya nu dikomentaran. Mung panginten dina leresan ieu, teu sadayana kanca tapis ngungkabkeun pamanggihna dina ngajen hiji karya. Malah boa seueur nu ngan ukur resep nyerat, tapi lebah kedah ngomentar nu daria neori mah rupina teu sadaya gaduh pakakasna. Sok sanaos anjeunna katajieun ku karya nu dikomentaranana, atanapi mendak kakirang dina eta karya, namung sesah kumaha ngedalkeun pamendakna. Seuseueurna komentar teh ukur kecap atanapi kalimah reaktif: edun euy, edas, asiiik, wah mantap, upamina. Numutkeun sim kuring mah komentar kitu teh sami sareng upami urang keprok sabada ninggal pintonan. Eta mah pintonan naon we, nu bisa ngabandang pangaresep urang, nu matak kataji. Boh musik, teater, tari, debus, balap kuda, ngadu domba, dangdut, atanapi naon wae. Keprok teh minangka ekspresi, pangajen urang ka nu dilalajoan. Da sok sanaos resep kana eta pintonan, teu sadayana tiasa nembrakkeun lebah mana resepna, ku naon make resep. Da mun teu resep mah moal parat boa lalajona ge. Kitu deui dina maca fikmin. Ngomentar teh seseringna (ieu mah sim kuring) kajurung ku rasa nu spontan. Mencet jempol, laju nulis, kalan-kalan mah ukur: "Ngageleser Ang!" upamina, mun karyana alus. Memang peryogi, komentar nu kritis, atanapi komentar nu apresiatif, nu katawisna ayeuna langkung seueur diserat utamina ku "fikminer senior" :D, nu tangtosna ageung mangpaatna kanggo kanggo ngajembaran pangaweruh kanca FBS. Namung komentar nu spontan, heureuy, atanapi ukur 'ngaramekeun' ge, teu sawios. Etang-etang ngaraketkeun hubungan emosi di antawis kanca FBS. Kacontoan kamari waktos ngariung di Unpad. Da tos biasa tea silih komen, silih jempolan dina ieu lapak, pas tepang teh langsung conggah, padahal anyar pinanggih. Namung tangtos, nu dipiharep mah langkung seueur komentar nu “bergizi” tibatan komentar nu dipapandekeun kana keprok tadi. Minimal aya tarekah nu daria ti kanca FBS dina nyurahan atanapi ngaapresiasi karya nu dibacana, nu diserat dina komentarna. Nu dipiharep, ieu lapak FBS teh aya mangpaatna. Sanes wungkul kanggo ngipuk sareng numuwuhkeun pangaresep kana ngarang fiksi (mini), jembarna atuh urang beuki nyaah kana Basa Sunda, tapi oge mangpaat pikeun panglipur. Da panginten aya nu daria pisan, maca fikmin teh, aya oge nu ngan ukur hayang manggih pangbeberah manah. Rupina teu aya lepatna. Kitu deui dina mosting fikmin, aya nu keyeng hoyong midangkeun karya nu tiasa ngahontal ajen sastra, aya oge nu ukur hayang babalagonjangan. Mangga teh teuing, asal jiga we heula. Da nu tos kantenan ngacapruk pisan mah dipupus ku admin.
16 jempol

Godi Suwarna: :"Aya sawatara SMS jeung nu nga-inboks ka sim uing, nu kasigeung ku ieu kintunan ti Ang Tatang Sumarsono. Cek uing, teu kedah teras pundung teu nyerat komen, komo pundung tina ieu lapak mah. Ieu kintunan anggap wae ngingetan deui urang, kana tujuan utama perkomenan dina ieu grup, nu di luhur tos debeberkeun panjang lebar. Da uing ge kalan-kalan sok kajongjonan heureuy, kitu deui Ang Tatang-na ku anjeun. Tapi, lain hartina komen-komen teh kedah nu 'berbobot' bae, nu matak kerung ka nu maraca. Tiasa bae didugikeun bari heureuy asal nyambung kana karya nu dikomen. Tos opat taun sim uing sok jeceh tur alewoh dina FB. Kabeh komen ku uing sok dibalesan, nepi ka taya nu ngomen deui. Da cek uing mah, nu ngomen teh pasti hayang direspon. Cek pikiran jeung hate uing,teu sopan ngaranna lamun urang teu males komen ti batur. Tah, sanajan cek Ang Tatang kreator teu kudu jeceh jeung alewoh, ah uing mah rek jeceh jeung alewoh we. Da malesan komen teh, lian ti nu disebut di luhur, oge itung-itung latihan nembrakeun rasa jeung pikiran dina kalimah. uing mah rek nurutan pangarang Inggris nu gawena nyieunan kalimah sapertos nu didongengkeun ku Ang Tatang..."
15 jempol

Rajah Pamungkas

Ku Deden Abdul Aziz

"Ahuuung..." Panjang tur melung. Sora Aki Dadan terus nungtung. Iwal jentréng kacapi dina wirahma Rajah Pamuka terus ngajentring. Ramo-ramo nyintreukan kacapi. Kalan-kalan diképrét. Dikeprak ku dampal. Nyipta nuansa. Tapi taya sora Aki Dadan ngarajah. Kalah sora jentréng beuki motah. Aki Dadan anteng ngajentréng. Mirig rajah nu teu kedal. Ngan saahung-ahungna. Aki Dadan kalah rambisak. Aya nu ngalémbéréh. Beureum. Cimata getih. Ramo-ramo kolot nu geus dalit jeung kacapi baloboran getih. Panon Aki Dadan buncelik. Moncorong. Burahay tanding banténg bayangan. Tapi sorana angger leungit. Aki Dadan ngadadak pireu. Ngabigeu. Tukang ngarajah bet ilang rajah. Kasilih sora pidato. Piligenti. Gegedén. Jeung para calon. "Ahuuung..." Sora pamungkas.*

[102 kecap]

Koméntar kana ieu Fikmin:

Akang Remi: Heuheu...Mung mirig nu promo rupina, tabeuh rajah teh! Ahuung muka jeung nutup acara!
Muhammad Shohiba Nu'man: Ahuuung...! Balangkeun ka nu keur pidato! Dahsyat Ang! Jempol pooool...!
Rudi Riadi: Sora rahayat beuki peura, beuki peura, beuki euweuhan. Atawa ceuli pejabat nu geus barudeg? halah...fikmin pulitis anu puitis...hehe. Cekap ku 102 kecap.
Asep Komara: Siiiiip, Ang......Nuju kelas 5 SD, simkuring kantos nongton nu mantun teh.....kebat dugi kaayeuna teu kantos ningal deui...asa lewang harita mah..ningal Ki Juru Pantun manggung sosoranganan...nu nongtonna oge corengcang, tapi teu gedag kaanginan...ngangres Ang...mung ayeuna mah sok aya dina radio geuning : "Sujud sukur ka Nu Agung Ya Alloh pangraksa jagat....".
Deden Abdul Aziz: Uhun, Ang Remi Sadkar, kedahna mah Si Aki nu promo albeum. Ieu mung janten figuran, ngagugurkeun kawajiban kapan meh diaku ngamumule budaya sorangan... Hahay!
Ahmad Fawzy Imron: abdi mah teu acan ngartos keneh kana eusina...bade nyanggakeun heula jempol wae..pamugi katampi kalayan kabingahan..hehe
Arom Hidayat: Kerén... Kang Deden.. Hung..ahung. -ngacungkeun jempol-
Yanti Sri Budiarti: Kacipta beurat tur ngahanju..! Saahung-ahungna, bari teu kebat..!
Irman Dimyatie: :"Gusti Nu Agung...!!! Harade pisan fikmin teh. Uing nepi ka lieur kudu ngomen hiji-hiji."
Akang Remi: Ahihihihi...Ngamumule sareng ngamumurah, asana mah benten hartos, ah Si Aki mah!
El Hijar: deudeuh teuing aki rajah, teungteuingeun si gegeden... tapi da kitu kanyataanana...
Deden Abdul Aziz: Dibalangkeun mah atuh bobor karahayuan Si Aki, Ang Shohiba Nu'man. Ieu teh kembaran fikmin nu di Unpad tea, tapi nembe diposting... Hihihi
Deden Abdul Aziz: Kitu kaayaanana kapan ceuk dalang oge, Ang Rudi Riadi. Pulitis, murilit nepi kana bitis...
Deden Abdul Aziz: Di Cianjur kantun saurang deui, nyaeta Ki Dadan (aslina ieu mah), Ang Asep Komara. Kapungkur kantos ngabandungan Aki Pantun ti Banjarsari, tapi ayeuna tos teu aya...
Deden Abdul Aziz: Bingah amarwata suta nampi jempol Ang Haji Fawzy Imron mah. Kantenan jempol nuju sasih mulud seueur berekatna...
Deden Abdul Aziz: Ahung, hatur nuhun, Ang Arom Hidayat... --newakan jempol
Deden Abdul Aziz: Ahung nu pamungkas tea pasti beurat, Ceuk Yanti Sri Budiarti...
Deden Abdul Aziz: Tong hiji-hiji atuh, Ang Irman Dimyatie, sapuluh disakalikeun tapi...
Deden Abdul Aziz: Murah tapi sanes ngamumurah maneh panginten, Ang Remi Sadkar...
Deden Abdul Aziz: Biasa mung janten panggembira supaya disebut ngaku keneh kana tradisi. Ngagugurkeun kawajiban tea dina seremoni kedah aya seni tradisi, Ang Ibnu Hijar Apandi...
Muhammad Shohiba Nu'man: Baruk! Duh, mun apal heded kieu mah kaduhung teu disungkeun. Moal nyamos teuing meureun. Heuheu
Endah Dinda Jenura: ieu fikmin pameran fotografi nya? ahahhha!
Nazarudin Azhar: Tadi teh geus komen di lapak ieu, tapi ka mana leosna nya? heuheu... Pokona mah edas tah. Introna mah tos nguping waktos nganjang tea malem Ahad kamari, pas maca fikminna, kasambung ku rasa ngangres, ras ka nasib seniman pantun nu dipireukeun gorowok banal kahirupan di sabudeureun... Mugia seniman sapertos Aki Dadan, kenging kamulyaan mungguh Gusti nu maha mibanda sakur rasa seni...
Akang Remi: Amin...
Deden Abdul Aziz: Harita mah pan nembe sapotong, Ang Shohiba Nu'man. Nembe direngsekeun bada acara dugika ayeuna...
Deden Abdul Aziz: Unggal aya acara biasanya Aki Dadan jadi pamuka, Neneng Dinda Jenura. Sakapeung Ki Dadan ngalanglaung ahung-ahungan, nu gaduh hajat mah jongjon we... mikmin, eh teteleponan.
Deden Abdul Aziz: Hayoh digulang-gaper apanan, Ang Nunu Azhar. Tah, Aki Dadan unggal dinten sok aya di DKC (tempat kamari Aang nonton titer tea)...
Ajeng Kania Rucita: ukur tamba bae, karunya ki Dadan teh
Deden Abdul Aziz: Tamba kawaranan, Ceu Ajeng Kania Rucita...
Godi Suwarna: :"Ieu fikmin ahung pisan, Yayi...! Sarua jeung urang, mikmin teh sakadar ahung-ahungan satengahing pagaliwotana mangpirang sora. Nya sawios we lah batan pireu pisan mah, da tangtos ari ahung mah bakal kapireng ku Nu Agung..."
Deden Abdul Aziz: Ahung pisan, Kakang Prabu Godi Suwarna. Ahungna ge kalan-kalan deuih, da seueur diraut digulang-gaper heula. Teu tiasa ngunclungkeung dugika juhlas ahung sadinten...
Budi Mugia Raspati: pami filem mah ieu teh Martin Scorsese..sesah ditaekana ieu mah..jempol nyanggakeun..
Deden Abdul Aziz: Diaos we tong ditaekan, Ang Budi Mugia Raspati, bilih tigurawil... hihihi

Ngeunaan Ieu Naskah:

Medal: 13 Maret 2012 19:01:27
Komentar: 33
Jempol: 43
Format: Tos Luyu
Revisi: Teu aya revisi
Postingan ieu naskah dina Facebook (klik di dieu)

Naskah lianna karya Deden Abdul Aziz