Bulan moncorong. Ranggeuyan bentang tingkaretip di langit harepan. Parahu ngangkleung di laut simpé, nyorangan. “ Naha kieu waé aing hirup téh” gerentesna ngabelesur ciciptan, nujul lemburna nujul imahna, kulawargana. Neuteup jaring dina luhur cai, geus opat jam teu oyag . Kamarana? Ombak ngaluhuran, parahu diayun ambing jaladri pasang. Layar dipulut. Kolébat beungeut pamajikanana jeung tilu budakna ngolébat, ras celembeng geulis si bungsu. Jurungkunung lambak gedé, parahu tibanting carem ka jero laut. Taya pitulung geusan pamuntangan. Jaring motah aroyag, rebuan lauk kajiret. Nu boga jaring tingtrim di alam kalanggengan. Waluya.