Panonna peureum. Dua dampal leungeun handapeun sirahna. Nangkarak luhureun salambar samak. Rénghap napas jeung tuktekna sora jam, silih témbalan. Peuting, simpé.
Beunta. Teuteupna mapay lalangit. Tuluy haharéwosan. Nyebut-nyebut hiji ngaran. Unggal nyebut, hiji tatu nambahan rangsakna rasa kapeurih manéhna. Kahayangna mah ngajerit. Ngabéjakeun sakabéh alesan. Nyorowokkeun sagala sono nu teu pernah diidinan jadi kekecapan atawa jadi tulisan. Sono nu salila-lila dikeueum jeroning dada. Nu ukur kedal jadi cimata.
Da jeung enyana. Guligah geus dipatri. Pageuh. Ngageuri.
Manéhna gumerendeng deui. Nuluykeun nyebutkeun hiji ngaran. Teu maduli dadana ngagetih wuwungan. Peupeur. Kangen diabur. Najan euweuh soraan.