Parahu geus lawas nangkub. Kaduhung baheula maké ditalapung. Ayeuna karasa butuhna. Dayeuh remen kakeueum. Ngemplang. Mindeng pugag lalampahan. Nya tangtuna ogé parahu anu merenah pikeun tutumpakan mah. Sina nyoloyong meulah beungeut cai. Éta pangna Sangkuriang ngajugjug deui ka tempat asal. Manggul balincong, ngajingjing linggis. Ditugar-disungkal. Teu onggét-onggét. Abong heueuh bahanna tina kai petingan, jieunan para guriang. Sugan kudu diseundak. Aduregeng nyacapkeun tanaga pamungkas. Teu burung ngagorémpal, laju nangkarak, kumaha ilaharna parahu. Bréh waé di sahandapeunana, para anggota déwan keur ragot pacéntal-céntal.