Teu bisa baha kana kahayang sepuh. Endén Putri Citraresmi kapaksa nampi panglamar Hayam Wuruk. Padahal geus aya beubeureuh nu satia. Unggal peuting datang. Nganjang bari demit. Gegejeburan teuleum dina lautan cinta.
Peuting éta minangka peuting panungtung. Anu ditungguan can jol kénéh. Naha ka mana? Umur-umuran can pernah jalir. Na kunaon? Gumerendeng sorangan. Tilingcingcat. Unggal aya sora luareun kamar gancang diburu. Ngajengjen dina lawang jandéla. Guligah.
Jangkrik jeung cihcir sorana patémbalan. Endag-endagan nepakan dada. Ucang-anggé dina haté nu liwung. Ngocéak dina jerona jero. Gugupay metotan rasa.
Peuting ngagayuh ka subuh. Aya nu ribut di lawang kaputrén. Wadya balad tentara karaton keur ngerepuk hiji lalaki. Imeut ditingali saha nu keur dikepung. Teu kasamaran. Arék dihulag. Ngan hanjakal sirahna kaburu ngagelenceng.