"Bapa uingah pangarang kahot. Anu maca karyana, langsung jaradi tokoh carita," ceuk Unén. "Rambo mah euweuh nanaonna. Unggal poé bapa uingah néwakan bangsat," aya nu nyelengkeung. Dodo nulak cangkéng. "Awak bapa uingah jangkung pisan. Kalapa gé ngalana dirawélan," ceuk Nyi Tini.
Ngariung di jero kelas. Uplek pisan.
Kabéh barungah. Euweuh nu teu nyarita. Unggal budak sarumanget nyaritakeun kahébatan bapana. Rupa-rupa dongéngna.
Najan hayang milu nyarita, tapi teu boga ideu. Garuk-garuk tidak gatal jadina. Ampun. Geuning kieu ari teu boga bapa téh, gerentes haté. "Uing boga indung tukang ngarang," cekéng téh. Lieuk kabéh beungeut maranco. Karagét. Euweuh nu lémék. Uing reuwas. Ngeleper.
Babaturan malencrong. "Anggeuskeun atuh!" ceuk Enjum. Panasaran. "Aslina Si Ema sok mikmin di FBS. Ngan hanjakal tara aya nu ngalaik. Anéh, nya?!" cekéng téh bari lumpat ka luar.