Janari. Tanghi. Hawa nyelecep. Tembus kana sungsuam. Sinarieun. Mang Satja jeung Bi Satja giak kaprak-keprek. Bray! Tepas hareup ngempray. Kopi jeung citéh panas ngabagug dina méja. Teu tinggaleun lalawuhna. Goréng sampeu manihot sapiring metung. Ngebul kénéh. "Sugan wé tamu pasusubuh téh nyimpang ka dieu!" pokna. Tara ti sasari. Wayah janari. Lain usumna Puasa. Lembur Mang Satja dumadakan haneuteun. Gidig ka ambén tukang. Cahaya lampu reyem-reyem. Gentong jeung tolombong kosong sayaga dina golodog. Pajarkeun téh, "Geusan nandéan panyecep Serangan Fajar!" Rét ka peuntaseun imah Jang Guru. Buruan sakola, keur TPS Pemilu masih kénéh simpé.