Tengah peuting di juru tajug. Kuring sila sorangan. Luak lieuk. Reup wé peureum, ngareureuh capé. Pipikiran narawang awang-awang. Ngagedor méga maya gantang. Ngadadak datang keleter sora ti kénca. Ah, horéam. Beunta unggal peuting, néang saréwu bulan. Geus puguh dicekék kasusah. Laat-léét késang ti beurang. Puasa tetep ditedunan. Lalampahan asa teu dina kagoréngan. Tong diteruskeun!
Euleuuuh! Gerentes ti katuhu. Dosa temen, kadé poho. Ceuk kolot, réa pahala-Na. Saencan bukti, mending nyekel béja. Wirid dikir di peuting ganjil, di ahir ramadan karim. Nyiar malem lailatul-qadar, mulung karahayuan. Sugan menang salam Jibril, Salâmun qaulan min rabbirrahîm! Duh, kasalametan dunya ahérat. Dunya ahérat salamet.
Lakadalah! Ribut dina sirah. Nu duaan jadi pacéntal-céntal. Silih témbal. Beuki peuting, beuki réang. Jol, balébat datang. Jep, maranéhna jempé. Tuluy pagabrug-gabrug, silih hampura. Kuring ngilu simpé. Neuleuman rasa séwang-séwangan. Ngagelar rasa kasalametan.