Rumasa, tiap ceramah di pangaosan nu ieu mah sok katarumpangan ku niat sèjèn; hayang kapakè ku Bu Nikèn. Wanoja nu dina halisna nyalindung kaajrih asih. Na imutna kahèman lir kaimanan nu geus kapanggih; sanggeus urang ngalaksanakeun sakur sarat katakwaan. "Alloh ukur masihan kasampurnaan ka jalma-jalma pinilih," cekèng waktu ceramah. Nyarita ka jamaah, tur nu enyana mah keur hatè sorangan. Hatè nu keur meujeuhna deukeut jeung Gustina; dilawungkeun ku ciptaan pangèndahna. Manèhna. Wanoja nyorangan nu sok leuwih ti heula nèmbongan saban nincak pakarangan ieu masjid. Nu geus jadi tanaga pikeun sakur kalimah ngeunaan kahadèan, sangkan kedal dina kamurnian ucapan kuring. "Mung Alloh nu baris ngaijabah sakabèh du'a urang," cekèng. Sora nu geterna bèda, ditilaman rèrèt ka lebah manèhna...
Mulang ti pangaosan, kalangkang Bu Nikèn disina ngampih. Diperenahkeun di lebah nu gampang nyampeurna, tapi hamo kasaba ku batur saimah, nu kiwari keur tibra, dina keukeupan.