Usum puasa taun kamari, urang pacantél cingir, bari silih ngingetan. Nyai moal leupas jangji. Sanajan jauh di pangumbaraan, ujang gé moal méngkol ka lain haté. Sataun ujang teu mulang, taya kabar nu bisa ditepikeun ka nyai, sabab hapé dijambrét di jalan, teu tinggaleun lokét jeung eusina. éeu tulus mulang, rék ngubaran haté, kalah raheut deui diuji Gusti. Akhirna ujang gawé deui. Cimata teu weléh nyuruluk mangsétan cikopi. Disumput-sumput ti dunungan jeung babaturan, éra temen kudu pada apal yén ujang rumisak bari irung ingsreuk-ingsreukkan mah. Ujang tara leupas ngadu'a ka nu Kawasa, sangkan diri nyai dijaga diriksa tina sagala kagoréngan jeung pitnah. Lamun enya jodo geus meungkeut pageuh, nyai moal kamamana, moal kusasaha. Diujina urang duaan, muga-muga jadi ciri yén urang téh makhluk nu pantes diguyur barokah. Wilujeng sasih siam Nyai. Cing getol tadarusan. Ulah dituncal tarawéhan. Ujang mulang nyandak nu ilang.