Pindah ka sisi leuweung. Sanggeus 25 taun pagilinggisik jeung ramé. Imah kai dina mumunggang pasir. Katelahna “Pondok Eros.” Sab dipelakan kembang Eros rupaning warna. Nenggang. Jiga séngsérang kongkoak, di tengahing tegalan jukut. Gumenclang. Pantes keur niiskeun pikir jeung haté. Pangeusina sapasang aki-nini. Can manjing caretuk huis. Jajauheun kundang iteuk. Mun pareng pakansi, sok daratang seuweu-putuna ti dayeuh. Katingali hégar, siga nu aya kariaan. Sab sok jeung peupeuncitan sagala. Ceuk badégana, nepika 2-3 domba. Barudak arulin di pakarangan, ngungudag papatong. Aki-ninina nyérangkeun. Bangun reueus. Tina genep budakna, reuay incu aya welasna. Hirup tingrim dina galih asih. Urang kampung nyarebutna Juragan Pangsiun. Duka pangsiun ti mana. Lamun lunta ka Pondok, teu meunang leuwih ti Isya. Mindeng kaparengkeun manggihan maung. Sagedé kebo, lain wadul. Mangsa bulan Mulud pondok simpé kacida. Kungsi ditéang ku Abah Merebot. Suwung. Pajah nu bogana jararah ka Kulon. Indit jeung datangna tara kanyahoan.