Kuring karék balik ti kebon. Tengahing usum katiga. Panén gandum geus lekasan. Keur manjing ngagiling. Sawaréh rék ngaseuk. Rupa-rupa kembang laligar. Kembang Daisy ox-éyé, nu tengahna konéng, ngadalingding. Seungitna matak beresin. Kembang jagong, kembang makuta jeung tulip leuweung, meuweuhkeun wawangi tingarapung. Ngawurkeun rosa gumbira. Haneuteun. Taneuh 20 hektar, saléot dikurilingan kabungah jeung tatan-tatan nimbang tatanén. Taun ieu mucekil. Bévka Murad, cikal awéwé geus sawawa. Dijeujeuhkeun ku Emangna nu balik ti Turki sangkan daék ka Yousuf. Anak Haji Abramovic, tatangga sawates taneuh. Lulusan Azhar Mesir. Bulan hareup dirapalan.
“Kopi téh mani raos kieu, Anné?”
“Pangirim Kardés, tah nuju di dieu.” Anné Bévka mairan.
Torojol , “Kocum.. tangtos capé.” Ngaléndéan, ngelapan karinget kuring ku anduk baseuh. Anné ngagelendut, pameunteuna semu beureum. “Ih, sonten kénéh. Kapan éngké ogé giliran Kardés.” Ngariung. Nyanghareupan susuguh. Kukupu pating geleber. Malegar ku panasna usum katiga. Areunteup dina kembang kayas, konéng saulas jeung bodas. Kuring ogé kukupu.
Footnote:
Anné Bévka=ummu Bevka. Kardes=akhwatu shagier=panggilan deudeuh ka maru. Kocum=Habibati=suamiku sayang.