Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Lalakon Ti Aleppo

Kénging Érwin Wahyudi
Dipidangkeun dina lapak 17 Maret 2013 13:45:38

Ampir tilu jam kuring nyamuni di ieu tempat. Lanté 5. Apartemén nu geus ditaringgalkeun ku pangeusina. Simpé. Teu nyangka, kuring bakal milu ancrub kana dunya anyar modél kieu.

Sabulan katukang, kuring kaleungitan budak nu keur meujeuhna kembang buruan. Nyawana paragat alatan serangan udara. Selang dua poé ti harita, salaki gugur di Homs. Saha nu teu nalangsa ditinggalkeun ku nu jadi beubeulahan haté? Tapi, nyeungceurikan nasib mah euweuh hartina. Pikeun males kanyeri, antukna milu palatihan tempur. Teuneung. Ludeung. Ngagabung jeung Mujahidin Jabhah Nushrah. Kiwari, saragam loréng katut bedil jadi gaganti salaki jeung budak.

"Roméo 25, fight!" Sora tina manpack. Sigep. Ngintip satukangeun jandéla. Bréh, patroli infanteri tentara Nushairiyah. Posisi témbak. Congo SVD Dragunov ditojokeun ka jalan. Sabeulah panon museur 'na teleskop. Curuk nangkod 'na palatuk. Operasi munggaran. Ketug jajantung mingkin ratug. Demi nu geus mulang. "Bismillah." Dor! Kaliber 7,62x54 mmR. Nembus kana sirah komandanna, anu leumpang rada béh hareup. Gubrag! "Yéss...!"

Komentar (43)

Firman Mauluddin
enyaan Ang, asa di medanjurit yeuh...
Iwan Hanjuang
Yes , fikmin sniper ieu aheng suraheng, karasa pisan ketug jajantung keur ngeceng make telescope..siippp lah jempol ti apih campur bawang beureum sabesek.
Ki Hasan
Meuntas ka Siria yeuh, Kang Érwin Wahyudi. Jigana ngarah militan mah enya kudu ngarekrut pasukan sakit hati. Hehehe
Is Tuning
Tah, istri mah geuning kitu mun gaduh kasakit ati téh. Komo ieu, dina kaayaan perang. Teu kapikiran hayang deui néangan salaki. Najan pélor tingbelesur nembus jajantung, nyinglarkeun nyawa tina raga pasukan musuh, kasakit ati bakal nyaliara satungtung hirup. Teuing nepi ka iraha. Dadana rénghap ranjug, tuluy ngagolosor diuk bari nyarandé. Panonna peureum, tanggah.. bari ngorong.
Nazarudin Azhar
Edun, tegep, Lur. Komo mun tungtungna rada sina misterius mah, teu dituntaskeun tepi ka didor... Tapi ieu ge asik...
Iwan Hanjuang
Nya ceuk Apih oge rada di misteriuskeun, wangkelang atuda.
Érwin Wahyudi
Hatur nuhun pami kamanah ku salira mah, Kang Ruhak Pajajaran...
Nasrul Jatnika
"Fikmin detailing ti pang perangan. Mantep jasa. Genaheun pisan jeung pilemis. Asa nempo pilem The Shooter, Mark Wahlberg."
Ki Hasan
Ari uing mah, Kang Nazarudin Azhar, lantaran sok noong filem India, asa can tuntas mun carita digantungkeun teh. Kudu nepi ka 'happy ending' wae. Ceuk sutradara India, mun filem teu 'happy ending' eta teh can anggeus caritana cenah. Hehehe
Érwin Wahyudi
Bingah pisan kasumpingan ku Apih Iwan Hanjuang. Nyanggakeun fikmin basajan ti Tasik, Pih. Hatur nuhun pami kalandep ku salira mah. Nuhun, ah! Kaleresan pun bojo téh gégéréwékan waé ku pangaos bawang, katampi pisan kintunan bawangna. Hehe
Mahpudin
Fikmin nan Detil... TOP.. Manawi teh Sergio Van Dijk aya SVD-an... heuheuheu... (Y) (Y) (Y)
Érwin Wahyudi
Yaktos, Ki Hasan, hoyong nyobian rada meuntas ka nu tebih séttingna. Saleresna mah, kaideuan ku lalakon wanoja ti Aleppo, anu janten sniper alatan kaleungitan murangkalihna sajodo, balukar tina perang sipil nu kiwari teu acan kénéh réngsé.
Érwin Wahyudi
Nyéréngéh ogé abdi nalika maos komén ti, Kang Is Tuning, utamina mah pungkasanana. Siip, lah! Nuhun, Kang...
Érwin Wahyudi
Yaktos, Kang Nunu, supados nambih kesan misterius, sakedahna pungkasanana téh rada dikelemengkeun, supados nu maos rada kerung saalit. Nuhun, ah, tos diwartosan, bekel kanggé mikmin ka payunna.
Irawan
widiiiiiih asa ningali film,Kang Érwin Wahyudi, meni capétang nyarioskeun rupa-rupa pakarang perang sareng kondisi detilna! hédéd nan pédéd Kang!
Érwin Wahyudi
Hehehe..., Apih mah da teu miwarang, raraosan mah. Nuhun, Apih Iwan. Penggemar pilem Bollywood ogé rupina mah, Ki Hasan téh. Hehehe...
Érwin Wahyudi
Katampi "Mantep jasa-na" Kang Haj Nasrul Jatnika. Nuhun pami kamanah ku salira mah.
Érwin Wahyudi
Halah...! Abong kéna bobotoh Persib, Kang Apoedy mah, mani langsung teg ka Sergio Van Dijk. Hehehe. SVD Dragunov, salah sawios bedil khusus unit sniper, buatan Rusia. Kiwari masih kénéh dianggo ku para milisi di Afghanistan, anu nyarumput di guha-guha pagunungan Tora Bora. Nuhun, Kang!
Érwin Wahyudi
Yaktos, Kang Irawan Babéh Lova. Fikmin ieu kaideuan ku pilem-pilem Hollywood. Abdi resep pisan upami nongton pilem dar-dér-dor téh. Nuhun, Kang!
Irawan
Saé Kang Érwin Wahyudi, kabayang papuket ngaréférénsina tah, saluuut lah!
Cucu Unisah
Ajeeeeeeebb....nampi keneh pasukan relawan teu yi...bd daftar ah...
Dewi Mentari
Jempol, Kang...Meni asa abdi nu janten tokohna....
Yanti Sri Budiarti
Wah...wah...waaah?! Ngajak meuntasan gurun sahara yeuh...:) Tos tebih geuning ngaprukna?
Ed Jénura
waaaahhh... nuju resep fikmin perang sigana c Amang... tegep nu ieu, pasti hasil ngungkaban literatur militer. top.
Iwan Hanjuang
Muhun Teh Éndah nuju resep fikmin perang abi.
Ed Jénura
sae, aya variasi. sugan teh sedep Amalia wungkul Kang Iwan teh, wkwkwkwk!
Rangga Wijaya
Mantep Kang Er...kenging iraha latihan perangna...? meni jiga... pol...pol...suropol...
Nyimas Kanjeng Ratu Yuyu
Asyiik..fikmin perang.
Rameli Agam
Perang di Suriah, balukar efek tina gerakan Arab Spring, gerakan refromasi di Timur Tengah geusan ngalawan diktator. Najan kitu, oge aya nu boga kamandang kieu, pajah Arab Spring teh ukur alat dina ngawujudkeun agenda barat jeung zionisme pikeun ngurangan kakuatan dunya Arab katut Islam dina "pangperangan Crusade moderen". Ku kitu ku kieu, nu eces mah kangaranan perang pasti ngabalukarkeun korban, nu leungiteun kolotna, leungiteun budakna, oge ngaleungitkeun ajen-inajen kamanusaan. So, not war, peace we lah. Mantap, Kang. Gurih dekh.
Rudianto Surya HS
, "Hookeun ku ieu fikmin. Gemet pisan Ang, kagambar pisan suasanana, bruh breh. Fikmin petingan ieu mah. Siip Ang."
Iwan Kurniawan
Nyaan asa nuju aya di tengah pakewuh perang Ang...
Érwin Wahyudi
Mangga, kantun daftarkeun! Namung husus kanggé Téh Cucu Unisah, mah, sanés bagéan tempur, namung janten bagéan koki sareng médis. Hehe. Nuhun, Téh...
Érwin Wahyudi
Katampi jempolna, Téh Dewi Mentari. Nuhun pami kamanah ku salira mah.
Érwin Wahyudi
Caket atuh ka gurun Sahara mah, Aceuk Yanti Sri Budiarti. Nu tebih mah ka Ciparay. Hehe...
Érwin Wahyudi
Yaktos, Ceu EDJ, nuju resep kana carita perang teh, komo perang éta mah. Hehe...! Nuhun parantos ngiring mairan.
Érwin Wahyudi
Apih Iwan, Kang Irawan Babéh Lova. Hatur nuhun tos ngiring ngeuyeuban fikmin abdi. Kabita ku fikmin AMALIA abi mah, fans-na seueur pisan. Hehe.
Érwin Wahyudi
Latihanna sasasih kapengker di Lebanon. Nu ngalatihna ti HAMAS. Hehe. Nuhun, Kang Rangga Wijaya.
Érwin Wahyudi
Nyanggakeun fikmin basajan sapertos kieu, Téh Nyimas Kanjeng Ratu Yuyu. Nuhun.
Érwin Wahyudi
Bingah nu taya hinggana kasumpingan ku pun lanceuk, Kang Rameli Agam, anu teu acan lami ieu dirapalan. Hatur nuhun, komén ti salira salawasna maparin élmu anu mundel. Wilujeng murak timbel, Kang, ngiring raos, ah! Hehe...
Nyimas Kanjeng Ratu Yuyu
pulsaan deui wae yeuh sigana
Érwin Wahyudi
Hatur nuhun, Kang Haji Rudi Al-fajri. Komén ti salira janten énergi positip kanggé abdi. Mugia ulah bosen maparin kamandang sareng ngélingan bilih abdi aya lepat nyerat sareng nu sanésna. Nuhun...
Érwin Wahyudi
Nuhun parantos ngiring mairan, Kang Iwan Kurniawan. Wilujeng leleson.
Érwin Wahyudi
Halaaah...! Isin, ah, Teh Nyimas! Bagéan nu sanéseun.