Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Sang SÉna

Kénging Hadi Aks
Dipidangkeun dina lapak 03 Fébruari 2013 22:15:08

Séna ngajentul ‘na batu buhun. Langit hideung sacur-sacureun rék nurunkeun hujan. Sanaha, putri ti Kalingga, nu nyuuh dina lahunanana sarua jempling. Séna ngarénghap, nyieuhkeun nu nyelek dina tikoro. Bréh deui dina ciciptanna hiji taman di Karaton Galuh nu marakbak ku cahya pésta. Langgéor Nyi Pohaci Rababu, istri Sempakwaja nu cunduk nebarkeun wawangi dalingding tanjung. “Aya purnama!” Sang Prabu Mandiminyak ngagerentes, kasirep ku sorot panon Nyi Pohaci, dahuanana pituin. Opat peuting, di taman nu ngelemeng ku cahya bulan, Sang Prabu jeung Nyi Pohaci ngudar kama séwang-séwang, dina rarambu halimun sutra. “Jadi aing, Séna si anak jadah!” ceuk Séna meupeuh batu. Gap nyengkatkeun Putri Sanaha. Mencrong panonna. “Sang Prabu ngalolos ka Kalingga. Tuluy nikah ka Putri Parwati indung anjeun. Urang geus pada mangkak duriat. Tapi tétéla urang tunggal sagetih!” Goak Nyi Putri ceurik bari ngarangkul. Cur hujan turun. Cimata langit nu nyakclakan kana kakayon di leuweung Galuh nu jempling.

Komentar (51)

Iwan Hanjuang
Ari fikmina mah geus pasti tegep, kumaha hibarna Yi, asa lawas pisan yeuh teu mikmin?
Hadi Aks
Iwan Hanjuang: hehe...pangesto, Kang! Kaetang lami pun ujing nyungseb, sanes teu kumejpt hyg mikmin.
Dédén Abdul Aziz
Asyik, Aka, fikmin sajarah. Tapi angger karasa fiksina, lain nyutat langsung tina sajarahna. Ngan, wandana kayas alum ieu mah. Duh!
Yuharno Uyuh
Haruuuuh! Tobaaat, ieu fikimn, leleb, teleb nenggel. Siiip Ang! Sakali modonghol ngajelegur.
Nasrul Jatnika
"Wah, mani gandang kieu fikmin Aka Hadi Aks. Jejer, tokhna oge setting jeung plot padedet jang uingah. Keula...keula..Ka. Deuk diaos heula reperensina. Heuheuheu..."
Puri Kania Pramanik War
Kang Hadi Aks, moal kitu iieu teh carios Bratasenawa tea atanapi Sena nu sanes?
Hadi Aks
Dédén Abdul Aziz: enya, nuju hoyong ngayas ngalum, adi! Teu dipuyam-peuyeum, tret plung we saayana...hehe.
Nyimas Kanjeng Ratu Yuyu
Haturan Kang Hadi Aks, lami teu katingal mikmin sakalieun sumping ngabagi fikmin nu hébring...matak pogot maosna.
Yuharno Uyuh
Waas lilingga kana lulumpang, heheh
Hadi Aks
Yuharno Uyuh; Karaos seuseutna puguh Ang, lami teu mikmin!
Yuharno Uyuh
Ah aiteun teh, dina seuseut malah tambih kareueut fikmina.
Hadi Aks
Nasrul Jatnika: Hehe..tina sempalan sajaroh Galuh, Ang Nasrul. Dina bab ieu, nu ngalangkang teh taya deui iwal ti kageulisan Nyi Pohaci Prababu...hehe.
Gaus Firdaus
Duh sono, maos fikminna!
Ki Hasan
Ari Nay Pwahaci Rababu teh adi beuteung atawa lanceuk beuteung Prabu Mandiminyak?
Hadi Aks
Puri Kania Pramanik War: Bratasena mah dina carita wayang, putra Pandu. Ieu mah Sena putra Mandiminyak, incuna Wretikendayun nu (cek katerangan sajarah) anu munggaran ngadegkeun Karajaan Galuh. Sena anak jadah Mandiminyak ti Pohaci Prababu. Walllhuwalam...
Tiktik Rusyani
Ngiring tunggara, karaos pisan nyeuitna. Incest teh tos aya ti kapungkur ning.
Puri Kania Pramanik War
Maksad teh sanes Bratasena, namung Bratasenawa, abdi kantos maos wawacan Pajajaran, namung duka karangan saha, mung kantos kaaos nami Bratasenawa...
Hadi Aks
Ki Hasan: Wah, boa enya lepat, Ki? Sempakwaja teh cek sajarah lanceukna Prabu Mandiminyak. Beu, enya, dahuan kedahna mah...:D
Hadi Aks
Gaus Firdaus: hehe, nuhun, Ang Gaus.
Ibnu Hijar Apandi
haruuuh.. bet kacipta hariringna... maksad teh di-lalampahantulang taleng-keun.. nyeaak...
Ki Hasan
Putra Wretikandayun teh asana tilu: Rahiyang Sempakwaja, Rahiyang Kidul, nu bungsu Rahiyang Mandiminyak. Nay Pwahaci Rababu istrina Rahiyang Sempakwaja. Kitu asana mah.
Hadi Aks
Tiktik Rusyani: Dina alam harita (bisa jadi diwenangkeun ku agama Syiwa nu diagem ku Prabu Mandiminyak) pernikahan sareng nu sagetih (sabapa) teh diwenangkeun, katelahna 'Pernikahan Manu'
Hadi Aks
Puri Kania Pramanik War; Rada kirang terang tah pakaitna sareng Bratasenawa mah, duh kdh ku ahli sajaroh rupina....hehe.
Hadi Aks
Nyimas Kanjeng Ratu Yuyu: hehe...kantenan sami sono ka Eteh, ka sadayana. Isin pgh pun uing teh, nyempod bae.
Hadi Aks
Ibnu Hijar Apandi: Sae adi, nanging kedah didoping heula ku ramuan cacing ti Neng Dewi Ratna Damayanti tea rupina...hahahaha.
Puri Kania Pramanik War
Pami teu lepat nami lengkepna Ranghiangtang Bratasenawa nu ngereh karajaan Galuh nu nikah ka Dewi Sannaha gaduh putra namina Sanjaya. Numutkeun eta wawacan, Ranghiangtang Bratasenawa gumelarna ka dunya hasil tina hubungan nu mopoek antawis Mandiminyak sareng Pwah Rababu, kitu pami teu lepat mah
Hadi Aks
Ki Hasan: Tuh, Akang mah mani norolang kitu kana sajarah Galuh teh. Dina sumber sejen, Rahyang Kidul teh aya nu nyebut Jantaka nu cenah gaduh kasakit burut.
Ibnu Hijar Apandi
hahaha... halah, Aka, rusiah rocker eta mah.. teu kenging dibuka di dieu.. maenya rocker ngaeueut ramuan cacing... tapi damangna mah ku eta.. numawi pesen deui... hahaha... nuhuuuun pisan...
Hadi Aks
Puri Kania Pramanik War; Wawancan di urang memang seueur anu direka tina sajarah. Sigana Sena teh Rahyang Bratasenawa tea, ramana Sanjaya.
Puri Kania Pramanik War
Rupina mah leres, hanjakal waktos harita bukuna teu ditambut, janten panasaran ku fikmin Akang...
Ahmad Fawzy Imron
Hoyong ngomen sapanjang-panjangna...namung ukur tiasa colohok. Poekkeun pisan kana eusina. Bati kabita we, Kang. Hoyong ngiring terang kana riwayat aslina.
Godi Suwarna
:"Weiiis, geuning karuhun uing bisa jadi fikmin nu tegep kieu, yeuh! Teu kapikir ku uing mah..! Tapi kirang rame, ah, da sugan teh Sempakwaja (Luluhur langsung sim uing nu kiwari ompong) rek sina hog-hag, tuluy gelut jeung Mandiminyak, marebutkeun harga diri..." :D
Sarjang
Asik, weweg, wangun carita sajarah nu janten fiksi, kayas hieum... Damang Aka... Ka mana wae?
Yayan Bedog Supriatna
Hatur salam pangabaktos ti pun kula kahonjuk Aka Hadi Aks. Moga jagjag waringkas, tatag tandang majoang impian.
Dewi Ratna Damayanti
haruuuhh... asa langkung hirup maos fikminna, janten emut kapungkur ka pun bapa, pami ngadongeng teh dugi ka pepeta. saur pun bapa, Prabu mandi minyak gagah perkasa, kasep kacida, kulitna herang siga dibalur minyak matak disebat mandiminyak... abi ukur colohok ngaregepkeunna. Nuhun Kang Hadi
Yayan Bedog Supriatna
Ceu Dewi Ratna Damayanti, jigana unggal entos mandi laju dibaluran ku minyak kayu putih salirana sawak-awak taya nu kalangkung dugi ka seselana, kitu?
Dewi Ratna Damayanti
@ kang Yayan Bedog... minyak kayu putih mah moal ge herang ateu Kang, pan nyerep heuheu... sigana mah minyak rampe da jaman harita mah pan minyak seungitna ku minyak rampe
Ari Andriansyah
Edun, Kang. Lawas teu mikmin ari gorehel teh, kabayang keneh eta nu nyangsaya dina lahunan, beu...
Hadi Aks
Ahmad Fawzy Imron: Nya kitu, dina sajarah teh seueur bagian nu 'menarik', aya kalana malah teu kdh dibungbuan deui. Para karuhun teu kirang-kirang nu matak aheng. Prabu Mandiminyak upamina, nu kawentar kasep kacapangan para mojang (paingan Ang Perbu Godi reueus pisan ku karuhunna!..hehe), dugi ka katelah Sang Amar 'si penabur cinta'. Pleyboy teh horeng aya ti dituna, yi haji...:D
Hadi Aks
Godi Suwarna: hahahaha....nya kitu perwatek Ki Sempakwaja. Rupina pedah asa luhung elmu tur kasakten. Cek ujaring carita, dina hiji mangsa nalika dog-dag neangan kahadean, anjeunna bet ngajak tarung,..:D Hadena teu dilayanan, teu jadi catur wiwirang ka incu turunan!
Mulyana SA
tegep pisan ang perkawinan satu darah (inses).
Dewi Ratna Damayanti
Dupi Jantaka anu burut tea kumaha dongengna tah? asa poek teu kacarioskeun deuinya?
Nazarudin Azhar
(y) (y) (y) (y) eta we komenna ti abdi mah, Aka...
Hadi Aks
Abah Sarjang: Nuhun Ang! Pangesto, sawangsulna kmh wartosna? Katingalna teras produktif Aang mah, kabita da uingah nyungseb lami...hehehe.
Hadi Aks
Yayan 'Bedog' Supriatna: Perkawis bajoang mah kantenan Mang Yan! Kedah teras ulah pundung jeung galideur. Dina ayana rereged nu beurat ngungkulanana, atawa sama sakali teu bisa diungkulan, nya naon hesena urang henteu gejed. Kawas cai ngocor bae. Kapendet di lebah dieu, ngocor ka ditu. Teu kudu ngabobol tanggul nu ngadingding, bisi matak banjir bandang, cilaka sarerea,..hehehe.
Hadi Aks
Dewi Ratna Damayanti: Uhun kitu cenah, cek katerangan dina sajarah Prabu Mandiminyak teh, Neng! Pangtegepna di antara dulur2na. Numawi diogo ti bubudak ku ramana Prabu Wretikendayun. Balukarna nya kitu ahlakna, resep pesta curak-curak, resep tepe-tepe, pleboy, malah wani ngiwatna pisan pamajikan lanceuk sorangan. Numawi kahade, bilih Neneng tepang srg nu herang salirana kawas minyak, nu dayut patuangan, kahade, sok teras ngiwat....hahahaha.
Shohiba Nu'man
Gustiii.. Ngalemod kieu, Akaa.. Nyeuit. Nanging ni'mat sagalarupina. Nuhuun..
Mulyana SA
Pami hoyong terang Putra Wretikandayun teh asana tilu: Rahiyang Sempakwaja, Rahiyang Kidul, nu bungsu Rahiyang Mandiminyak... kedah maos buku naon abdi nya Ki Hasan?
Ki Hasan
Ki Sunda Sawawa, nya bacaan we kitab konengna, jiga buku sajarah, naskah heubeul, jsb. Contona: Ekajati, Edi S. (2005). Kebudayaan Sunda Zaman Pajajaran. Yayasan Cipta Loka Caraka. Naskah Carita Parahyangan (1580), fragmen Kropak 406. Naskah beraksara Sunda Kuno, bahasa Sunda Kuno. Koleksi: Perpustakaan Nasional RI.
Mulyana SA
Muhun Ang tos dicopas ku abdi. Katampi pisan
Irman N Dimyatié
:"Sang Prabu meni bangor kitu. Lain turutaneun. Karunya ka turunanna nu geus galede papada tepung, terus silih pikacinta. Teu apal dulur. Seueur ayeuna ge sang prabu-prabu sejen di zaman kiwari."