Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Dongèng Isin

Kénging Nazarudin Azhar
Dipidangkeun dina lapak 01 Fébruari 2013 18:42:06

Mang Isin ngahiang. Kitu ceuk nu guyur di lembur Cukangkaluman. Rèa nu percaya, lantaran cenah Mang Isin tèh, "Turunan katujuh Ki Darma, karuhun salembur Talun, nu dipendem di tonggoheun Situhieum." Rèa nu percaya lain jalma samanèa. "Seuweu ti Kondangheupeu, rundayan Embah Nyaluntang tukang mileykeun pakarang," ceuk katerangan sèjèn. "Ngèlmu si èta mah," ceuk nu ngaku barayana. Cenah, miwanoh nu teu katèmbong, nyobat jeung nu nariskala. Katambah bisa ngubaran jalma nu kasarumahan. Kungsi aya nu nangènan, maung asup ka buruan, cat ka imah jadi Isin! Kari-kari anak pamajikanana ibur, Mang Isin geus dua poè teu mulang, taya iber, komo datang. Salembur milu nèangan. Ngasruk tepi ka wates Pasir Sembah, leuweung nu teu meunang digadabah lèngkah. Tepung Kemis taya raratan. Mang Isin ngaleungit lir ibun wanci manceran.
Peuting, kacaangan sinar bulan, handapeun tangkal putat, sisi walungan Cimenyan, aya iket jeung kamprét ngagolér jiga gelung. Nyongclo. Na saguncluk tai maung.

Komentar (34)

Mulyana SA
Isin-isin.... ngalalana implengan abdi Ang Nazarudin Azhar, Ilang tampa laratan... ehm bati ngahelas juragan. (Y) (Y) (Y) (Y)
Rudi Riadi
Beu, ngahiang. Titisan Prabu Siliwangi tea kitu Mang Isin teh? Nimat macana.
Ed Jénura
ah fikmin gossip ieu mah, cenah wungkul eusina, nutur-nutur kalimahna ge bari cangcaya, wkwkkwk! dongeng nu edun, sugestif pisan. ending-na matak panasaran...
Nasrul Jatnika
"Beu..henteu jiga di Jepang. Mang Isin teh tumuwuh meh diunggal jalmi. Majar dilembur urang mah, Mang Isin teh dilegleg kerud, nya Ang Prabu Nunu Nazarudin Azhar? Kakawasaan nu sok ngalegleg Mang Isin buleud-buleud. Hadeuh, karak sabalen diaos..ke cuang sabalik deui. (y) (y) (y) (y) (y)."
Budi Mugia Raspati
Matak pikabitaeun ngadongengkeunana. Matak pogot dibacana. Asa digugusur ti kalimah ka kalimah. Naon atuh basa Sundana "cermat" teh? Ah mangga we ieu tampi jempol ti Andalusia.
Rudianto Surya HS
Fikmin model kieu panginten nu disebat ku Kang Perbu Godi Suwarna "bonsay' teh, ungkarana kotkan ngaburinyay. Balung tunggalna weweg. Turutaneun ieu mah, wajib dideres. Wareg pisan. Nyanggakeun tahu Sumedang sa-Conggeang.
EMAN BUDIMAN
beu... diteureuy maung kitu mang isin teh atanapi malih rupa janten maung ?
Yuharno Uyuh
Moal kitu mang isin teh, dongeng parabu siliwang? Heheh
Nyimas Kanjeng Ratu Yuyu
Matak panasaran nu maos ieu mah...naha Mang Isin téh robih jirim janten maung atanapi didahar maung? Teungteuingeun wé upami teu ngawaler kapanasaran Étéh...omat inbox-keun wé bilih nu sanés janten apaleun mah nya...plisss da Kang Nunu mah bageur sareng kasép...:)
Rohaendi
Dongeng Ka nunu Nazarudin geus pasti heded, plotna jelas, tokohna matak pogot, konflikna matak ngaruy. Halah garenah dipanggungkeun. Beuh top Ka.
Nazarudin Azhar
Halah, aya nu teu kacontréngan, ampuun, nembé sidik sabada dikunclungkeun, heu... Haturnuhun aprésiasina kanggo Ki Sunda Sawawa, Ang Rudi Riadi, Téh Éndah, nyanggakeun dongéng énténg pikaisineun, héhé
Nyimas Kanjeng Ratu Yuyu
wios atuh hilap mah...teu janten ngaganggu pogotna maos
Dédén Abdul Aziz
Caritana mah basajan, tapi matak resep ngadongèngkeunana. Loba kalimah jeung ungkara nu matak genah macana. Matak pogot...
Entjep Sunardhi
Moal néangan jurig teu kadeuleu. Kari-kari Mang Isin lengit, tai maung huisan (aéh, dicongcloan nu siga gelung).
Érwin Wahyudi
Mang Isin, ngahiang. Dilegleg ku maung KPK. Hawatos. Hehe.
Sarjang
Ari brasna ka mana mah tos apal, bubuhan tos dibacakeun kalayan tatag, mung kumargi diropea deui, janten langkung sieup. Ngan pas maca, uing kalahka jadi ngabayangkeun Ang Nunu keur maca... Asik pisan!
Dewi Ratna Damayanti
wuesss... bari ngabayangkeun Kang Nunu ngadongeng... asa di kawali da heuheu... nikmat...
Shohiba Nu'man
Mantaap.. Seueur pisan kecap-kecap pulunganeun. Klasikan nanging tetep aptudet.. Tinekanan, Ang.. Keprok digentos ku jempol sareng pairan.. Heu..
Rameli Agam
Seueur jalma nu tos sagala gaduh tur kahontal, saperti harta banda, elmu, pangaruh, kakawasaan, jabatan. Ngan hiji nu teu gaduh teh (boa dihaja), nyeta rasa kaisin.
Maman Gantra
Te O Pe, Kang!
Teti Taryani
Teu bosen maosna, neda widi bade dikopas Kang Nunaz...
Nazarudin Azhar
Hatur nuhun aprèsiasina, Kang Nasrul, Ang Budi Mugia, Ang Rudi, Kang Eboed, Kang Uyuh, kalih Tèh Yuyu. Nuju diajar ngadongèng ieu tèh cariosna mah, hèhè. Tos lami kandeg mikmin, asa dadaligdeugan deui. Ngotrèt ieu gè jalaran kasumangetan waktos ngariung di Kang Perbu, kaseungeut ku sumanget nu ngariung, hèhè
Nazarudin Azhar
Aka Rohendi, Ang Deden, puguh karampa aya keneh perbanan, barang tos dikunclungkeun teh. Asa tos gemet singhoreng aya nu karaos ngeplos. Eh, ka Teh Yuyu, mangga ke diharewoskeun, hehe.
Nazarudin Azhar
Nyanggakeun Kang Entjep, manawi tiasa janten dongeng panglipur. Oge kanggo Ang Erwin, Abah Sarjang, rupina kedah sering ngariung bari ngagalantangkeun fikmin teh nya? Karaos energina kanggo ngotret. Kanggo Teh Maya oge, hayu urang ngalumar deui, hehe. Rindu panggung dicemporan.
Godi Suwarna
:"Tov Markotov..." sakitu we ti uingah. Batan uing kapapanjang ngomen ka nu geus nembrak hebringna. Uingah rek nanya we; kumaha proses kreatif-na ieu fikmin teh, Jang?"
Nazarudin Azhar
Ang Nu'man, ngimpleng hoyong gaduh fikmin panggungkeuneun. sabada macaan deui fikmin heubeul, seuseueurna geuning 'fikmin kamar', sanes 'fikmin mimbar', hehe. Nyanggakeun, Ang. Kanggo Kang Agam, leres kitu pisan. Rada sesah milari Mang Isin teh ayeuna mah, hehe... Kanggo Kang Maman oge hatur nuhun apresiasina. Kanggo Teh Teti, nyanggakeun, manawi aya mangpaatna. Hatur nuhun, Teh...
Dewi Ratna Damayanti
hayuuuuu... abi mah rindu kana karnavalna oge hhahahaha....
Nazarudin Azhar
Kang Godi, hatur nuhun, hehehe. Saestuna kahoyong mah ieu teh ngadamel fikmin humor, dikotret waktos ngariung di sanggar Kang Perbu, mung harita mah nami tokohna Mang Udin. Ngotretna teu rengse, waktos dibaca harita sesana ku improp. Diparatkeun kamari, sateuacan diposting. Digentos nami tokohna janten Mang Isin, maksadna mah sangkan langkung merenah sareng latar carita, sareng upami dilisankeun asa bakal langkung karaos humorna..Tapi, duka ieu teh hasilna mah bet janten asa aya perbanan keneh, hehe...
Godi Suwarna
:"Diksina edun lah. Ngaran jalma, ngaran tempat, kecap-kecap nu tos 'klasik' ngantebkeun rasa dongengna. Sigana, ieu fikmin teh kaidean ku paribasa: Nini-nini leungit sapeuting, kari-kari isukna tai maung huisan..! Haha..."
Ari Andriansyah
Sugan teh moal ka dinya brasna, heureuy campur ngerik, matak hoyong seuri bari nyanyautan. Ka dieunakeun mah gayana diguluyurkeun, Kang. Asa sono oge ka nu ungkara nyeuit tea geuning, heheh...
Nazarudin Azhar
Kang Godi, leres pisan, tina paribasa eta, hehe... Imajinatif pisan paribasana... Nynggakeun Ang Ari, dongeng enteng ti pilemburan, Ang :D
Irman N Dimyatié
:"Edun. Teu kapikir ku uing dina runtuyan kalimahna. Renjaganana ngajeletit. Nyoco jiga sireum ateul. Teu karasa mimitina, ngan lila-lila jadi nyaliara."
Nena Cunara
Duuuuh, beuki isin we sim uing mah. Ngasah teh mintul wae. Dongeng luar biasa.
Gaus Firdaus
Gileee... ulin ungkarana, hamo katurutan, eung!