Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Béak Déngkak

Kénging Dadan Sutisna
Dipidangkeun dina lapak 20 Désémber 2012 19:17:30

Lebah péngkolan, persis dina tanjakan, uing nyérangkeun Mang Uja nu keur leumpang bari angkaribung. Mang Uja katémbong maké jas hujan, padahal keur tengah poé éréng-éréngan. Dina cangkéngna ngagawing pedang, méh ngagangsar kanan taneuh. Batu asahan digémbol ku sepré, dibeulitkeun kana cangkéng, ngabendul lebah beuteung, siga awéwé keur bureuyeung. Taktak kénca méyékéh manggul tarajé, taktak katuhu manggul panto dapur. Suku kénca maké sendal, suku katuhu maké sapatu. Dina tonggongna ngagawing pot kembang, ditalian ku tambang, sina ngurawed kana taktak. Tina pot kembang, ngambay tali rapia, tuluy meulit kana beuheung ucing hideung nu ngiclik tukangeunana. "Jang, gudang mah acan kabawa!" cék Mang Uja ngagorowok, bari rénghap ranjug tayohna. "Teu ilahar pan aya gudang dipapanggul! Hésé jeung riba. Emang geus béak déngkak mikiran mindahkeun gudang. Kumaha ngakalanana, Jang?”

***
Catetan: Saprak aya saémbara ngasah téa, simuing nyobaan nyieun fikmin maké kecap "Batu, pedang, panto, jas hujan, sapatu, tarajé, sendal, kembang, ucing hideung, gudang, bulan, péngkolan, sepré". Sanés nanaon, asa kapancing wé. Asa hayang nyobaan. Juhlas jam hulang-huleng, teu mendak nanaon. Éstuning hésé béléké, dicobaan sababaraha kali, asa teu weléh ningnang. Kekecapan nu tilu welas siki téh asa aing-aingan waé. Tungtungna mah kieu geuning, béak déngkak.

Komentar (51)

Yanti Sri Budiarti
Haruh, ngiring ripuh maosna ge...:D Sono ka fikmin-fikmin Kang Dadan Sutisna..:D
Dewi Ratna Damayanti
hahaha... ari bulan teu ngiring dipanggul kang? Aeh aya ketang... hehe... percantenlah kang dadan tea sanes bantrak-bantrakeun ... :))
Mahpudin
nu datang bulan nyerangkeun ti kajauhan. "Eta jelema meni angkaribung kitu! Deuk kamana?" Heuheuheuheuheu.....
Iwan Hanjuang
Nyaan amang ngusek yeuh maca ieu, da nyararambung atuh kecapna bisa keneh di logikaan jeung kacipta ku maksana sagala diringkid, Satir pisan keur pamilon mah lamun cerdas macana.
Godi Suwarna
:"WHahahahaha...! Uingah teu weleh ngeunah seuri ku ieu fikmin, najan macana geus sababaraha balikan oge. Mimiti nyerengeh barang maca kalimah : 'Mang Uja katémbong maké jas hujan, padahal keur tengah poé éréng-éréngan'. Aneh, cekeng. Sugan burung Mang Uja teh, ceuk hate. Serengeh beuki meber, beuki meber meh tepi kana ceuli, da kacipta atuh angkaribungna. Lila-lila nyakakak. Kantenan barang tepi ka 'Jaang, gudang mah can kabawa!' Uing jungkir tina korsi, teu kuat nahan seuri. Eduuuun...!" Bawirasa, ieu fikmin asahan nu pang-ahengna. Parodi nu rancage kana kagiatan asah fikmin. Fikmin 'jeprut' nu sabenerna mah daria pisan. Kabaca teknis 'mangarang' Jang Dadan Sutisna, nu karasa pisan dina ngawangun plotna, ti datar, terus nanjak, tepi ka muncakna pisan. Dina ieu fikmn, kagambarkeun oge kumaha ripuhna, hulang-hulengna, jungkir-balikna, para fikminer dina mateakeun kecap bahan, diwakilan ku ringkung, angkaribungna Mang Uja tea. 'Jang, gudang mah can kabawa...jst' Antukna, Mang Uja waleh, taak, taluk, bisa jadi Mang Uja teh ngangluh ka nu ngarangna, sakaligus nu ngarangna ngangluh ka nu ngabahanan kecap. Haha! Hebriiiing....! Tapi, yaktos, ieu fikmin ngait pisan kana kagiatan fikmin asahan. Da upama teu dihubungkeun jeung eta mah, bakal ilang 'komarana'.
Indah Eka Lestari
Heuheu...! Fikminna rame :D kacipta ripuhna eta nu nyanyandak sagala...
Arif Syamsuri
hehehe ... sugan teh moal midang, nyeta atuh matak aral ... jeung ateul utek, ... sendal, jas hujan, gudang,... asa can kungsi aya sajak ngabahas kecap eta mah, komo jadi tema fikmin.
Tiktik Rusyani
Gudang mah kantun disungkal weh, talian teras gugusur..heuheu. Haduh..abdi teu eureun ngusek yeuh..
Kurotuaeni
hatur nuhun pisan kanggo kang Dadan Sutisna, landong pisan kanggo kula mah... refresh uteuk.
Dadan Sutisna
Yanti Sri Budiarti, ah, euceu mah, rajeung téh sono kana fikminna ...:D
Dadan Sutisna
Dewi Ratna Damayanti, Apoedy Sarah Ihsan: Nu mawi teu diiringkeun kana saémbara gé, kahiji can bérés, kadua teu meunang apan. Bulan mah aya, ngan teu disabit-sabit téh: piraku tengah poé éréng-éréngan aya bulan? -- [padahal mah enya kaliwat, hehehe]
Godi Suwarna
:"DULUR-DULUR, DER, AH NGAROMEN KANA IEU FIKMIN. NU KOMENNA PANGHADENA CEUK UING, KE DIKIRIM "BUKU SAJAK DONGENG SI UJANG" NU GEUS MEUNANG NGAJAMPEAN SANGKAN HARADE KANA MIKMIN. PALANGGERAN NGOMEN; ULAH KURANG TI LIMA PULUH KECAP, ULAH LEUWIH TI SARATUS KECAP. KOMENNA TEU KEDAH NGILMIAH BAE, KOMEN RANCAGE WE. NU MATAK NYEREP, MATAK NYERENGEH. SANTAAAAI! DEEEER, AAAH 'LUUUR...!"
Dadan Sutisna
Mang Iwan, wios Mang teu kedah disatpaman nu ieu mah...
Dadan Sutisna
Mang Godi, Najan kitu, angger wé aya kecap nu euweuh,"“bulan". Kitu cék Bi Dewi Ratna Damayanti kalih Mang Apoedy. Tapi sigana beuki ripuheun Mang Uja, mun séttingna téh ... dina bulan puasa.
Mahpudin
Abdi ge tadi damel fikmin teh... tinggaleun sendal... tapi ayeuna mah tos dilebetkeun ka nu bade naek taraje, sendalna dilaan.... heuheuheu....
Dadan Sutisna
Indah Eka Lestari: Nu mawi ieu téh rencana mah badé dipilemkeun, Néng. Nuju milari kénéh saha kinten-kinten nu keresa jadi tokoh Mang Uja...
Kurotuaeni
cek mang uja bari ngudag awewe nu bulan alaeun. maksa ieu mah. hehehe
Dadan Sutisna
Arif Syamsuri, upami teu kitu mah, atuh sanés gé ngasah, Mang, héhéhé...
Dadan Sutisna
Téh Tiktik, atuda Mang Uja téh boro-boro nyungkal gudang, ngagusur ucing gé, tos ripuheun pisan....
Ajuns Agus Djunaedi Sulaiman
naha atuh mang Uja miangna teh lain tengah peuting pas caang bulan purnama .........................
Tiktik Rusyani
Da atuh meni matak ngesang saembara ieu mah, aheng kacida. Numatak teu heran mun Mang Uja ngadadak sakti oge, bakat ku uleng mikir kumaha napel-napelkeun kecap bahan kana ungkara nu ngalagena meureun.Ngarah teu maksa sumawonna asal-asalan mah.Kang Dadan motret ieu "bancang pakewuh" di nagri fikmin kalawan telik,cerdas..tapi matak ngusek. Nyaan, humor tingkat tinggi!
Yuharno Uyuh
Pun uing oge Ang Ang Apoedy Sarah Ihsan, Ang Dadan Sutisna, boro tonggoy meh angeus kana pungkasan, ari heg, kecap sepre tinggaleun. Haduh kapaksa diacak-acak deui. Anu tadina bakal ngaler na kalah ngidul. Antukna ngahuleng deui. Najan kitu malah tambah pogot.
Dadan Sutisna
Teh Zaneta: Tos kénging sabaraha judul, Téh?
Dadan Sutisna
Ajuns Agus Djunaedi Sulaiman, pamali Mang mawa ucing hideung ti peuting mah... Pan ucing hideung téh, cék sakaol, nu sok dikukut ku nu ungkleuk-ungkleukan dina korsi goyang. Nu buuk ngarumbay nyapuan ubin. Nu sok ngabangingik mangsa tatangkalan diteleg peuting. Komo mun malem Jumaah. Komo mun keur hujan ngaririncik. Komo mun dibarung séorna angin....Komo deui pas ... bulan purnama,
Indah Eka Lestari
Oh kitu nya Mang Dadan, muhun sing enggal kengingnyaaa...! Heuheu :D
Budi Mugia Raspati
Tos Alhamdulillah tiasa jebul hiji oge haruuh. Nyaan matak angkaribung mun aral mah. Heuheu
Kurotuaeni
ari judul mah tos dua kang Dadan Sutisna, tapi ari eusina mah duka, ja landong lieur ngotret niley. hehehe
Kang Bibih
Supados bulan ka pangulmah gentos we awewe bureuyeng ku bulan alaeun hehe
Eka Saraswati
Bade ngefans ah ka Mang Uja :D
Dadan Sutisna
Tiktik Rusyani, Nyaéta atuh Téh, di alam dunya sigana can aya saémbara ngarang nu kecapna diwatesanan, bari hasilna teu meunang leuwih 150 kecap. Leuwih réa watesan kecap, leuwih hésé jeung matak uleng. Ah, wayahna wé rupinan, minggu ieu mah lapak urang téh kedah pinuh ku tarajé, jsb. Hidup Mang Nazarudin Azhar.
Dadan Sutisna
Puguh kitu pisan, Mang Uyuh, seueur fikminer nu ngadak-ngadak tinggaleun sendal dina tarajé...
Dadan Sutisna
Indah Eka Lestari: kitu pisan, Néng. Mun tos kénging nu kersa merankeun Mang Uja, engké tinggal milari saha kinten-kinten nu kersa merankeun gudang.
Dadan Sutisna
Ang Budi, sakinten atuh sakitu gé. Kedah énggal-énggal numpeng étah...
Dadan Sutisna
Teh Zaneta: tong teuing diémutan eusina mah, Téh. Nu penting judulna heula :D
Dadan Sutisna
Ekka Saraswati, Mun badé ngeféns ka Mang Uja mah, saratna kedah mantuan mindahkeun gudang, kersa?
Eka Saraswati
Haruuuuhh... wios bedo atuh pami kitu mah. Bolay ngefans-na.
Godi Suwarna
:"DULUR-DULUR, DER, AH NGAROMEN KANA IEU FIKMIN. NU KOMENNA PANGHADENA CEUK UING, KE DIKIRIM "BUKU SAJAK DONGENG SI UJANG" NU GEUS MEUNANG NGAJAMPEAN SANGKAN HARADE KANA MIKMIN. PALANGGERAN NGOMEN; ULAH KURANG TI LIMA PULUH KECAP, ULAH LEUWIH TI SARATUS KECAP. KOMENNA TEU KEDAH NGILMIAH BAE, KOMEN RANCAGE WE. NU MATAK NYEREP, MATAK NYERENGEH. SANTAAAAI! DEEEER, AAAH 'LUUUR...!"
Remi Purwaka Sadkar
Asa emut keur diospek ka Mang uja teh. Diparentah mawa sakur bahan, nu geus dicatetkeun. Kabeh geus kabawa, dina bentuk siloka nu luyu jeung kuduna. Ngan hiji nu teu kapikir. Yen gudang nu keur dipikiran teh bisa diwakilkeun kana roko Gudang Garam Filter, Beureum, jsb. Anapon kitu. Mun tea mah ieu fikmin dikaitkeun jeung kagiatan saembara tea, kacida logisna. Tur matak asoy dibawa ngararaoskeun deui mangsa-mangsa diospek baheula. Manstap! Ku kituna sim kuring salaku rerencanganana Girang Pangajen, mutuskeun, Yen ieu fikmin kedah pisan dileler janten jawara utama, dina saembara ieu. Hehehehe...Asooooy!
Ya Soebarta
Ajeuh..tadina bade uleng heula tapi ieu serengeh miheulaan..kapaksa we uleng serengeh...tapi da uleng deui, fikmin juh puluh manea tea ieu mah. Da atuh asa pakuat pakait sareng kaayaan manusa jaman kiwari anu angkaribung bebekelan. Dunya dunya jeung dunya. Kacipta deuh...!!! jempoler mania kasanggakeun juh gudang...!!
Indah Eka Lestari
Mang Dadan, upami tos kenging peran kanggo gudang teras kumaha deui tah? :D
Kurotuaeni
Pelebah dieu gudangna elmu tah. Jadi nu ngaranna gudang eta lain bae tempat neudeun barang ungkul, tapi Fiksimini Sunda oge gudang elmu pangaweruh tan wates wangen. Sabab lain buku nu jadi gudang elmu nu keukeuweuk mang uja, tapi parimbon ker ngitung poe jeung bulan nu hade ker jalan-jalan ka karang taraje nu aya di basisir laut kidul.
Ajuns Agus Djunaedi Sulaiman
Lamun keur teui digawe mah dibantuan mang Uja teh ku kuring. Hanjakal aya gawe keur nyacag ucing hideung make pedang dina talenan batu. Aral tuda ngegelan sendal jeung sapatu tiap poe. Ari kembang dipatamanan mah ulah diomong deui, digaley kumanehna.Mun hayang asup ka imah teu dibere tulak, sasarana teh panto dicakaran nepi ka laasna, komo mun geus manjing ka gudang, diacak-acak ku siborokokok teh. Kungsi eta oge dipiceun dibuntel sepre ka walungan pengkolan kuburan bada Isya pas waktu bulan keus sapasi, bari huhujanan da teu gableh jas hujan, tapi balik deui ka imah eta ucing teh. Pernah eta oge digantung maka tambang dina taraje, tarajena potong, heueuh da geus butut. Tah kitu mang Uja, hampura kuring teu bisa ngabantuan.
Tiktik Rusyani
Mang Uja mah ukur ripuh ku cape..pedah sagala ditapelkeun sareng digusur, abdi mah dugi ka gegetret ateul ku kaligata..nyiksa pisan, sutres diserang ku rombongan kecap bahan nu muyeng wae na uteuk. Dikumahakeun dikamanakeun napelkeunana...Asli, barang pung mah diposting, eta kaligata dadak sakala ngahiang. Kang Nunu Nazarudin Azhar, kedah kenging rekor Muri..pedah sukses "Ngaririeut " fikminer ku saembara aheng ieu.Jenius..abiss! Kang Dan, kade Mang Uja kedah dipeuseul tah, hawatos teuing digantungan 11 barang. Untung gudang sareng bulan mah kakantun..heuheu.
Kang Bibih
"Sok lah uing ge sanggup ari ngan saukur mawa gudang mah" Jang Sueb nawarkeun jasa ka Mang Uja. Mang Uja Mureleng meh panto dapur dina taktakna murag.. "Sok sia kéhèd bisa mah gubug. mun teu kabawa dibaledog ku tarajé gera...", "Ah sakieu mah cetek" Ngarawu Gudang bret disoehkeun kop dipadut sabatang, ckes ngahurungkeun korek nyot Gudang garam di udud.
Yuharno Uyuh
Leres Ang Dadan, Ang Resi Godi, ku hebatna ideu Ang Nazarudin ku ayana saembara Nyi Fikmin, di bumina para fikmner janten geunleung. Dumdakan warung parayu tengah peuting digedor da seepeun sasahen udud,kopi. Menrong deui kana monitor, nu dikamar ngageroan teu ditolih. "Ke, cekeng teh sepre can kaasupkeun," Nu di kamar norojol. "Na da teu moe sepre!" Pokna. Uing ngeunah seuri.Manehna kerung bari ngaleos."Heueuh ieu taraje tinggaleun deuih!" Manehna norojol deui. Uing seuri beuki nyakakak manehna oge kabawakeun.
Yanti Sri Budiarti
Kang Dadan Sutisna,nyaan abdi mah sono kana fikmin-fikminna, kantenan kanu nyeratna..:D Jempol kasanggakeun kanggo fikmin hédéd ieu. Bati hulang-huleng juhlas jam gé teu panasaran, kabuktosan geuning kenging béak déngkak teh jol brol wé fikmin nu matak ngehkey. Dugi ka rambisak. Sanés bohong! Tuda saenyana éta kecap-kecap nu dibahankeun téh matak ngarorojok uteuk. Rék diantep gé kalah hayoh wé ngélékéték. Teu kaur reup. Teu jongjon barang damel. Ngung-ngéng, kecap-kecap "batu, pedang, panto, jas hujan, sapatu, tarajé, sendal, kembang, ucing hideung, gudang, bulan, péngkolan, sepré". Nu matak hélok ieu saémbara téh tiasa ngahudangkeun maung tapa. Sakitu Kang Dadan nu katawisna tara kabujeng lolongok ka lapak FBS ogé ahirna nguniang. Jebul fikmin Mang Uja nu béak déngkak ngakalan hayang bisa mawa gudang. Siga heureuy. Siga dapon jadi. Tapi tiasa kasurti, saenyana urang hirup kalolobaanna sok ngariripuh awak sorangan. Sakirana teu kabadanan mah ulah maksakeun karep. Kitu tah pesan nu tiasa kasanggap. Nuhun!
Nining Sariningsih
Mang Uja nu beak dengkak, tapi teu weleh matak nyakakak. Teu beak dengkak kumaha, kantenan abdi mah nu nembean ancrub. Haruuuuuh, asa sepaneng. Hyg diajar ngahijikeun 13 kecap anu patojaiyah. Dugi ka hulang huleng kawas nu tengar kalongeun. Bakat ku hoyong ngasah. Sanaos pakakasna mintul pisan. Tapi reueus pisan ku Kang Dadan Sutisna. Nu tiasa ngolah nu 13 kecap janten Fikmin anu seger.
Godi Suwarna
"DULUR-DULUR, DER, AH NGAROMEN KANA IEU FIKMIN. NU KOMENNA PANGHADENA CEUK UING, KE KU UING DIKIRIM "BUKU SAJAK DONGENG SI UJANG" NU GEUS MEUNANG NGAJAMPEAN SANGKAN HARADE KANA MIKMIN. PALANGGERAN NGOMEN; ULAH KURANG TI LIMA PULUH KECAP, ULAH LEUWIH TI SARATUS KECAP. KOMENNA TEU KEDAH NGILMIAH BAE, KOMEN RANCAGE WE. NU MATAK NYEREP, MATAK NYERENGEH. SANTAAAAI! DEEEER, AAAH 'LUUUR...!"
Adah Sulaeman
Sigana eta Mang Uja mun diteuteup ti hareup ti mimiti pinareup nepi ka nu ngabendul sagede peureup (kabunian eta mah) matak nyeukeukeuk. Upami di tingal ti tukang, ti mimiti pupundakan mapay ka handap kana mumuncangan, matak calangap. Bakal ngabarakatak. Kabayang lamun Mang Uja leumpang mapay gang, bakal loba tatangga nu lapor ka pos ronda, sabab pager jeung bentengna kababad taraje. Pareng panggih jeung barudak, bakal disebut "nu gelo anyar" (padahal geus heubeul, nya?)
Tisna Kamisyah
Aduh, abdi kirang tiasa koment, mung asa kawakilan ku fikmin beak dengkakna Ang Dadan Sutisna....sesah ning mikmin teh...he he sugan we ka kintun Buku sajakna Ang Godi Suwarna .
Ha ES Munawar
tos babagi rapot lajeng maca fikmin ieu, teu kiat, tina awit seri ditahan anten nyakakak oge....