"Mana sakola haratis téh. Wadul siah !"
"Pajar rumah sakit gratis. Bohong nataku !
"Silaing jadi ngajabat geuning angger banjir. Dasar belegug !"
"Ah kadongdora loba jangji. Korupsi mah heueuh !"
"Oh ieu nu jangji rék nyaah ka rahayat téh ?!"
Belewer, belesing, beletak, koloyong, solontod, gubrag ! Naon waé nu aya dibalédog-balédogkeun ku balaréa. Ki Ardasim ngagubrag teu walakaya. Gelebug angin gedé naker. Walungan ngadak-ngadak caah. Caina hanjat ka darat, banjir umpalan. Balaréa paburisat paburencay, tapi kabéh euweuh nu salamet. Dempak papak tumpur ludes.
Nyi Atikah kekejetan, budag-badug, gurinjal hudang. Ambekanna rénghap ranjug. Ngimpi bet asa dikieuna. Digigireunna, Ki Ardasim tibra saré. Nyi Atikah neuteup anteb kana beungetna.
"Akang salaki abdi, bedokeun wé atuh. Tong janten nyalon gubernur téh !" Teu sadar, Nyi Atikah cumarita sorangan.