Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Bagavad-gita

Kénging Aditia Gunawan
Dipidangkeun dina lapak 09 Méi 2012 09:02:17

“Héy putra Kunti! Mangka iyatna! Sadaya bagja katut cilaka ukur saheulaanan. Lir bagantina usum. Nu saéstu, ti bihari baring supagi, taya saurang nu ilang di antara urang. Kurawa atawa Pandawa. Inget! Rayi téh nyanding gelaran satria. Ksat téh nganyenyeri, trayaté téh nangtayungan. Nangtayungan darma najan kudu ngarah pati, hakékatna. Geura pentangkeun gondéwa! Puseurkeun kana tujuan anu mulya!”
Mireungeu Kresna tatag sasauran, Arjuna ngeleter binarung ketir. Ras ka Dorna jeung Bisma. Guru sepuh nu jaradi musuh.
“Kang Rayi émut kana piwulang Sang Resi Dorna nalika diajar manah manuk?”
“Yaktos, Kakang Prabu!”
“Di antara paraputra Pandu, kapan mung Kang Rayi nu kasinugrahan seukeut paneuteup? Kapan Kang Rai nu ukur mencrong kana hulu manuk basa mentangkeun gondéwa, saheulaanan dulur-dulur Kang Rayi panénjona meléng kana pangpung, kana tatangkalan nu ngarandakah, ka sanak baraya, kana sakur pangbibita? Sawadina Rayi seukeut ngalenyepan maksud Kakang.”
“Sumuhun Kakang ... tapi saéstuna harita téh Rayi ngemu rusiah nu tacan kakedalkeun.”
“Balaka, Partha, balaka!”
“Sajaba huluna téh, Rayi ningal panonna, tur tina panonna katémbong cai nu ngembeng.”

Komentar (27)

Godi Suwarna
:"Halaaah, pungkasanana eduuun dekh, Ang...!"
Pandu Radea
anteb.
Aditia Gunawan
Godi Suwarna: "Tag teg tog deui nyeratna Kang Prebu..."
Aditia Gunawan
Hatur nuhun kang Pandu Radea :)
Godi Suwarna
:"Tangtos kana kitu, Ang...! Bongan we luluasan, lami pisan ngantunkeun ieu lapak. Hehe.."
Asep Supriatna
Leres pisan, pungkasanana mani ngajedud pisan kana angen..., hatur nuhun !
Aditia Gunawan
Sami-sami Kang Asep Supriatna, nyanggakeun. Iraha Sambada bade magelaran deui? :)
Ki Hasan
Halah mantap Kang Aditia Gunawan. Eta paneuteup seukeut arjuna, nu bisa nembus nepi ka nangenan cimata manuk ti jauhna, jigana kiwari mah geus ngajanggelek jadi teknologi toropong.
Aditia Gunawan
Toropong mikro sanes Ki Hasan? Heuheu.
Dudi Herlianto
jadi panasaran, naon nu ngalantarankeun arjuna kolu ngalepas panah sanggeus ningali cimata ngembeng eta. sakadar hayang lulus ujian? :)(:
Pandu Radea
arjuna leuwih neuleuman kana rasa. cimata manuk, najan ukur manuk, jadi ciri rasa welas Arjuna pikeun naker alesan penting henteuna eta manuk nu teu tuah teu dosa dipanah. seukeutna rasa arjuna, jadi inti danurweda. numawi najan cimata manuk sakitu jauhna, katangen ku rasa arjuna. numawi kitu karakterna Arjuna, tumungkul, lungguh. teu ladak jiga karna. manawi...
Aditia Gunawan
Kang Dudi Herlianto, dina Adiparwa, nalika diajar manah, Arjuna janten mesatkeun jamparingna, dugi ka sapat hulu manuk teh.
Aditia Gunawan
Carios ngeunaan Arjuna nu ningal panon manuk teh saleresna teu aya dina babak Bagavad-Gita atanapi Adiparwa, mung husus aya dina fikmin.
Dudi Herlianto
nuhun, kang Pandu, nya kulantaran eta, nu nyaurkeun yen arjuna teh jalma turutaneun, abdi jadi panasaran naon pertimbangan nu aya dina pikiran arjuna harita dugi ka kolu, saur kang Aditia, nyapatkeun hulu manuk eta.... nu kapikiran ku abdi mah nembe sakadar lulus ujian.
Ki Hasan
Nu jadi pasualan Kang Aditia Gunawan, mun enya arjuna leuwih neuleuman rasa jiga ceuk dongeng Kang Pandu Radea, rasa nu mana nu dipake ku arjuna nalika mutuskeun tinimbangan ngajamparing hulu manuk nepi ka ngagelenceng, nu geus puguh manuk keur ngembeng cimata. Boa jigana Arjuna weruh sadurung wirahong, eh winara, atawa diharewosan Dewa, tug nepi ka boga pamadegan eta cimata manuk teh, air mata buaya. Hahaha. Kitu meureun Kang Dudi Herlianto tah.
Dudi Herlianto
haha.. Ki, boa-boa namina memang manuk buaya tah :D
Didin Tulus
Geuning di fikmin mah seueur laloma kana carita wayang nya?! Sugan turunan ki dalang wungkul, tapi da resep tur rame deuih! Saluuut...
Aditia Gunawan
Abdi mah ningal Arjuna teh justru sosok anu manusiawi, sakumaha nu ditetelakeun kang Dudi Herlianto. Boh nalika diajar, boh nalika kedah perang nu saenyana. Teu weleh bingbang. Tapi, punjulna Arjuna teh tina dasa-indriyana anu seukeut. Padahal, ceuk Kresna mah justru indria manusa teh wungkul cangkang.
Pandu Radea
Sae kang. memang teu aya dina bhagawadgita mah. abdi nuju nyurahan ieu fikmin utamina dina sabilna arjuna maju ka palagan. Kresna ngageuingkeun sumanget arjuna ku jalan ngemutan kana carita manuk. adatna dina perang nu teu tuah teu dosa ge kasesered jadi korban.
Ahmad Yani
Kang Aditia Gunawan : Mung hanjakal nya, ari cisoca Bambang Ekalaya, sareng getih nu ngocor tina jempol katuhuna nu ngagelencengmah, teu katingalieun ku Cep Arjuna teh ! ? he he he !
Pandu Radea
Arjuna memang bimbang, seu'eur nimbang alesan tina hal-hal anu rek dipilampahna. motifna alesan heula, nembe tindakan. Nyapatkeun hulu manuk perkara enteng keur arjuna. ngan perang batin atawa meruhkeun nafsu mateni dina hatena nu ngalantarankeun arjuna sok sabil. Bhagawadgita ngebrehkeun eta pisan. maju ka kurusetra lain harti perang dohir wae, tapi perang jeung hawa nafsu pikeun mersihan diri. kuru = begang (kana awak), setra bersih.
Aditia Gunawan
Ahmad Yani: Dina babak eta, saleresna Arjuna mah ngarasa ajrih ka Bambang Ekalaya, tapi Dorna anu tinimbanganana beda.
Pandu Radea
Ki Hasan : dongenging dongeng, alesanana, keur harita arjuna leuwih tuhu kana parentah nu jadi guruna.
Ki Hasan
Kang Pandu Radea, kuru begang, setra beresih mah atuh tos make jurus kirata urang Garut. Da dina Mahabarata mah Kurusetra teh ngaran povinsi di India Utara.
Pandu Radea
Ki Hasan : hehehe.... bade kirata ti garut, bade kirenjul ti India. sakadar nyurahan da bongan carita wayang teh tos janten kalangenan.
Nazarudin Azhar
Arjuna bisa nyeueung lambang nu ambigu, cimata. Ieu nu ngalantarankeun simuing laju betah neuleuman ieu fikmin... Nikmat jasa, Ang..
Aditia Gunawan
Hatur nuhun Kang Nazarudin Azhar. :) Nyanggakeun sadaya-daya.