Ku Dadi Arya
“Janten kumaha, Pa Mentri?” pokna. “Sumuhun. Kapaksa BBM kedah naék. Subsidina dialihkeun kana BLT, kanggo rahayat kénéh.” Jawabna, kalem. “Ékol siah, BLT mah keur pencitraan!” nu batik beureum muncereng. “Rék ngaronjatkeun sora partéy? Teu panuju!” nu batik konéng nyanggéréng. “Interupsi, pingpinan! Interupsi!” nu dariuk di tukang tinggorowok, teterejel. “Nu teu panuju gé, ékol. Hayang katempo jiga ngabéla rahayat?” nu batik biru ngaléléwé. “Trok..Trok!” palu diketrokkeun kana méja. “Heup…heup! Protés diwenangkeun. Namung nganggo étika. Isin atuh, panan rapat urang téh diliput média.” Pimpinan rapat ngarépéhkeun.
Kélénéng! Kélénéng! Loncéng disada. “Interupsi pingpinan… waktosna tuang siang,” ceuk nu baju sarwa bodas, deukeuteun lawang. “Ulah lali leueut landongna, nya?” Lalaki gigireunna ngémbohan. “Aaah, Suster mah ngaganggu waé…” pingpinan luwa-lewé. “Tapi engké teraskeun deui sisidanganna, nya Pa Dokter?” nu dibaratik pipilueun. Dijawab unggeuk, bari imut. Bring, saréréa nguntuy ka rohang makan, di éta RSJ.