Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Kapireungpeunan

Kénging Muhammad Shohiba Nu'man
Dipidangkeun dina lapak 13 Fébruari 2012 19:42:44

Satutas awéh salam, ras kaingetan. Geus lila pisan teu ngaderes Kur’an. Mushap dironjang. Dicagap téh kacida ngeresna. Kekebul kuat ka nagleg. Ditiup disakalikeun, beu! Kapireungpeunan. Peurih. Gigisik. Cirambayan. Ngalamurkeun tetempoan. Geuwat ka cai, ngadon sibeungeut. Panon dikucek. Keukeuh. Kalahka mongkléng. Teu katempo curuk-curuk acan. Ngarayap, ngalelebah ka pajuaran. Nepi ogé. Meubeutkeun awak luhureun ranjang. Jedak! Humaregung. Nyeri campuh jeung reuwas. Naha kasur dumadak teuas? Diragapan. Taringgul. Moal salah. Batu! Eusi kamar geus jaradi batu. Ray pias. Tingsariak. Boa enya di jero guha? Uyap-ayap néangan lawang. Jedak! Tarang. Jeduk bincurang. Tungtungna mah nyuuh. Inget sagala dosa. Balilihan.
Nyay! Tah, geuningan. Paningali geus balik deui. Satitik cangra ngolényay. Beuki caang. Haté bungangang. Dideukeutan. Atra. Horéng lain lawang. Bati hélok. Cahaya tingborélak. Tina jangjangna, tina jubahna. Sérab ku teuteup seukeutna. “Baca!” sentakna. Jengkang! Poék di bumi alam.

Komentar (51)

Iwan Hanjuang
duh jadi tariris Yi,rus-ras lalampahan didunya,sip surisip Yi.
Yusef Muldiyana
Alah kumaha atuh geus lila teu ngaderes qur'an kalah hayoooh weh ngaderes akasara jeung gambar hirup na youtube :(
Teti Taryani
Nuhun Ayi Muhammad Shohiba Nu'man, parantos diemutan ku fikmin panggeuing nu sakieu saena... jazakalloh.....
Shohiba Nu'man
Kang Iwan, Jih, komo abdi mah, Kang! Landong tiris teh bati sajeket-jeketna.. Heu.. Hatur nuhuun..
Arom Hidayat
Haduh! Caritana ngaguluyur tangtos eusina mah lenyepaneun pisan, azib pokona mah!
Shohiba Nu'man
Kang Yusef Muldiyana II, Asal diniatan ibadah bae, Kang! hehe
Shohiba Nu'man
Aceuk Teti Taryani. Nyanggakeun. Hatur nuhun pami kamanah mah. Tos lami teu mairan. Kumaha, damang?
Shohiba Nu'man
Kang Arom Hidayat. Hatur nuhun, Kang! Kapeureumpeunan ku nu valentinan yeuh.. heuheu..
Jojo Johari
Tobat! Tobaat! Tobaaaat! Simuing enyaan kasindiran yeuh! Ampun tobaaaat! Haddduh! Mani seukeut kieu ieu teh? Ampun Mama, ampuuun! Moal sakali-kali deui tambelar kana kabutuh. Maos AlQur'an teh apanan sategesna mah kabutuh kahirupan. Tobaaaat!
Godi Suwarna
:"Kapireupeunan ku kekebul jaman, ana tepung jeung jatining cahaya kalah terus lolong. Krunyaaaa dekh...! Idena orsinil, Jang..! Can kungsi aya nu ngagarap. Jempol juh telebug tah..."
Metty Azmira
asa muringkak maosna ge, tapi eta nu aya jangjangan sareng ngangge jubah teh saha nya?
Shohiba Nu'man
Kang Jojo Johari, Horrr...! Ieu mah hiburan bae, Kang. Namung, bilih kasurahanana janten kitu mah, nya sumangga nyanggakeun. Ngiring bingah bae abdi mah.. Heuheu.. Hatur nuhuun..
Arom Hidayat
Punten Kang Prabu, Kapireupeunan atanapi kapareumpeunan? Atanapi sami.
Shohiba Nu'man
Kang Prabu Godi Suwarna, Ieung...! Kapendak bae eung ku Ingkang guru mah. Telak, Kang Prab! Eta pisan. Eta Pisan! Haruh, meungpeun bari ngahaturkeun nuhun kana jempol juh telebugna.. :)
Shohiba Nu'man
Ibu Metty Azmira, Wilujeng muringkak, Ibu.. Perkawis nu dijubah mah nyanggakeun teu langkung nu maosna.. Hatur nuhun..
Arom Hidayat
Kapeureumpeunan maksad téh. Wilujeng Valentinan Kang Nu'man.
Shohiba Nu'man
Kang Arom. Tara valentinan abdi mah, Kang. Mung coklat sareng kembangna bae.. hehe. Leres. Nembe kauninga kasauran Kang Prabu Godi Suwarna antawis kapireupeunan sareng kapeureumpeunan. Sami teu nya?
Godi Suwarna
Arom Hidayat:"Biasana mah 'kapireupeunan' atanapi sok aya oge nu 'kapireungpeunan'....
Teti Taryani
Alhamdulillah, pangesto, Ayi Muhammad Shohiba Nu'man. Numawi nuju rada seueur garapeun, dugi ka rada lami aceuk teu langak-longok ka nagri fikmin. Mingkin lami teh mingkin sarae karyana... resep seueur pulunganeunana...
Endah Dinda Jenura
ampun ah... janten rus-ras ka diri olangan, katampi pisan, nuhun, Mang...
Maman Gantra
Sapuk, Teh Teti. Ieu lapak teh seueur pisan pulunganeunnana. Kalebet yasana Kang Muhammad Shohiba ieu... Tegep, Kang! Ngiring serab...
Nazarudin Azhar
Fikmin haturan generasi fésbuk, héhé. Asik pisan Ang. Mundel.
Eva Nurlianah
Haruuh! Panggeuing ka diri, rumaos lawas tara ngaderes&'maca' Al-Quran. Nuhun Kang katampi pisan Fikminna! Mugia manah2 nu teuas keuna ku cahya Al-Quran...
Shohiba Nu'man
Aceuk Teti Taryani. Baruk, nuju sibuk geuning. Muhun Aceuk, beuki maloher fikminer teh ayeuna mah. Asa kakantun sidikan abdi ge..
Shohiba Nu'man
Teh Endah, Yee.. Teu pisan-pisan mapatahan, Eteh.. Ieu mah fikmin nu estu kasurahan ku Kang Prabu. Heuheu
Shohiba Nu'man
Kang Maman Gantra, Sami diajar ang, Cuang nganggo kacamata hideung bae ayeuna mah.. Ameh gaya! hehe
Teti Taryani
Kantenan aceuk mah, ema-ema nu rada boyot,tebih pisan kakantunna ningal karya nu maridang sakieu saraena. Reueus, Ayi Muhammad Shohiba Nu'man... seueur nu ngadamel sareng micinta karya Sunda...
Shohiba Nu'man
Ang Nazarudin Azhar, Fikmin nyungkun, Ang! Pedah taya nu ngintun cokelat sareng kembang. Haha.. Hatur nuhuun...
Shohiba Nu'man
Teh Eva Nurlianah, Sami-sami, Eteh.. Ah, ieu mah bati saserat-seratna. Hayu ayeuna mah cuang musabakoh tilawatil fikmin. Heu..
Metty Azmira
Rupina mah kaburu soak, teu emut ka alip-alip bingkeng acan, dipiwarang maca teh. Rupina urang ge engke di alam kubur saupami ditalek ku malaikat, "manrobuka"!, sanaos nuju masih hirup di apal-apal oge tetep we ngabigeu, da mung amal soleh nu jadi tungtunan.
Shohiba Nu'man
Ibu Metty Azmira, Rupina kitu. Mudah-mudahan bae tiasa ngawaler.
Yadi Fathur
Subhanalloh...
Cassa Grande
weis. Pami teu mudun teh hamo katangen wé ieu fikmin téh. hahaha... sueger
Shohiba Nu'man
Kang Yadi Fathur, Sesuatu banget.. Heuheu.. Hatur nuhun..
Shohiba Nu'man
Kang Cassa Grande, Nyeta karaos. Rada heureut pami ku henpon mah. Cangkeul mapayna. Hatur nuhun tos mairan.
Asep Komara
Jibril lungsur deui ?...bit ....ah...paralun....punten...teu wantun nyurahan...heu..heu...fikminna mah sae...
Shohiba Nu'man
Kang Asep Komara, tah lebah eta mah estu fikmin pisan. Heuheu.. Hatur nuhun..
Wida Waridah
Kana ngaderes teh, puguh sok rada talangke. Mung, saparantos aya Iqbal, sakali kantos ningal mamahna ngaderes, ayeuna teh teu kaop pami beres solat, sok ngasong2 qur'an...
Irman N Dimyatié
:"Subhanallah...! Ngageter hate simkuring macana. Ieu mah kategori fikmin sufistis. Teu sagawayah nyurahanana. Jempol heula wae, Ang".
Shohiba Nu'man
Teh Wida, Duh, Waas. Aya ku soleh. Geregeuteun. Hoyong nangkeup, ngagalentoran Iqbal.. (Sun Jauh ti Amang kituh..)
Shohiba Nu'man
Ang Irman, Hatur nuhun, Ang! Katampi jempolna. Diantos surahanana.. :)
Teja Sukmana
Lami teu nolih kana ajaran agama, tos tangtos poékeun. caangna deui, mun tos ngalaman tidagor ku musibah. Emutna deui kana ibadah téh mun seug aya dina kaayaan keur susah. Keur dbulen ku kasenangan dunya mah, tara ieu tual toél kana Qur'an, sajadah gé nepi ka bulukan. Nuhun Kang Muhammad Shohiba Nu'man..
Rohaendi
beuh beurat beurat, beurat jasa, hade pisan ka.
Ahmad Fawzy Imron
suasana di lebet guha hiro..karaos pisan...
Shohiba Nu'man
Kang Teja Sukmana, Sami-sami Kang, Hatur nuhun surahanana. Duh, Abdi pisan eta mah.. Beu.
Shohiba Nu'man
Aka Rohendi, Hatur sewu nuhun, Aka. Nyanggakeun.
Shohiba Nu'man
Kang Haji Ahmad Fawzy, Wah, rupina mah Kang Haji kantos ngahajakeun nikreuh ka jabal Nur. Hatur nuhuun.. :)
Ahmad Fawzy Imron
sering, kang...sering pisan netepan sunat bari calik di lebetna...duh, Goor Hira..
Shohiba Nu'man
Gustii.. Waas. Sono. Pauntuy-untuy ka luhur. Ret ka handap. Marakbakna Al-Mukaromah.. Hiks
Yanti Sri Budiarti
Luhur...Luhur pisaaan..! Uyup-ayap teu kadongkang..! Sanes mung ukur kapeureungpeunan teteh mah nanging dugi ka kedah dioprek soca teh..!
Shohiba Nu'man
Hatur nuhun Teh Yanti.. Haduh, dugi ka kedah dioprek kitu mah rada hawatos. Kedah ku optik batin. Heuheu..