Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Anti Klimaks

Kénging Lugiena De
Dipidangkeun dina lapak 01 Fébruari 2012 22:29:38

Duaan pahareup-hareup. Dua pasang panon jago seukeut silih teuteup. Gagang pedang dikeupeul pageuh. Leungeun kénca na sarangka. Luhureun kuda-kuda anu panceg. Di hiji tegalan angar nu dianginan haseup. Panonpoé ngabetrak. Hawar-hawar sora gagak. Simpé.

Dua satria pahareup-hareup. Taya nu usik. Lantaran pada-pada surti yén obahna awak séwang-séwang geus tanding detik. Ukur silih intip. Silih taker kakuatan. Silih teguh itungan. Kuda-kuda angger panceg. Gagang pedang dikeupeul pageuh. Leungeun kénca na sarangka.

Beurang ilang. Hawa cipruk disaput ibun. Béntang baranang. Dua satria anteng pada-pada maca getering rénghap jeung sorot panon lawan. Taya nu usik najan saeutik. Lantaran salah usik saeutik hartina pati. Antukna angger lir mimiti. Kuda-kuda tuluy panceg. Gagang pedang dikeupeul pageuh. Leungeun kénca na sarangka.

Hawar-hawar gagak. Séor angin. Sora insékta. Kongkorongok hayam. Balébat di wétan. Peuting peuray. Tapi dua satria taya nu murwa mesat pakarang tiheula. Duanana pada-pada silih dago panarajang. Kuda-kuda teu weléh panceg. Gagang pedang dikeupeul pageuh. Leungeun kénca na sarangka.

Komentar (37)

Nazarudin Azhar
Hahaha, ngalageday ang. Édas pisan ieu fikmin. Nyanggakeun jempol!
Godi Suwarna
:"Asoooy...! Ieu mah leuwih dramatis, leuwih jero batan tarung antara Musashi jeung Sasaki Kojiro. Hebaaat...!"
Dadan Sutisna
Uing mah ngan bisa nyebut hade, eung. Fikmin nu unik tapi pelem.
Lugiena De
Nazarudin Azhar, Godi Suwarna, Dadan Sutisna: Hatur nuhun. Pan ieu ge kailhaman tina tarungna Kojiro jeung Mushashi. Heu heu heu...
Sarjang
Siiip... Campuh pisan gelut hatena...
Lugiena De
@Abah Sarjang: Upami parantos ningal pilem Hero mah rupina moal tebih ti kitu. Heu heu
Shohiba Nu'man
Edas! Dramatis pisan, Ang!
Lugiena De
Nyanggakeun Kang Muhammad Shohiba Nu'man. Manawi kamanah. Dikantun heula ah sadayana. Tabuh 02.30 diantosan ku Barca vs Valencia. He he he...
Nana Sukmana
Waduh, emang kuat teu puguh rasa, yeuh. Milu nahan renghap. Heded, Lo. Hede, lah!
Iberani Man
huahahahaha..manstap ! kang dupi fermentasi satria, sabarah pangaosna, leuh moal teu asoy alkoholna ge, geus di poe di ibun kitu mah !...heueheueheu
Is Tuning
Arék moal ieu téh ? mun moal, rék maké sarung wé deui..
Meila Handayani
deuuhhh burukeun ateuh ah gelutna cangkeul yeuhhh hiihihi
Remi Sadkar
deuh, hanas di antosan,geuning silh teuteup keneh bae...
Teti Mardiana
sok atuh der sooook atuh geura derrrr
Lugiena De
Hatur nuhun ka sadayana.
Fearless Firman
sami sami
Yanti Sri Budiarti
Duh, meni cangkeul kieu ngantosan nu tarung jogolan pati. Tapi geuning kalah ngadon ngadu teuteup. Siga pada-pada teu wani...:) he he
Lugiena De
Manawi nu ngarangna oge sami tos cangkeul. Heu heu heu...
Godi Suwarna
:"Teu bosen-bosen macana, 'Jang...! Uing tea resep kana silat mah...'
Lugiena De
Godi Suwarna: Nyanggakeun betrak-betruk. Teu langkung, bade diloyogkeun sareng Kho Ping Ho atanapi Mushashi. He he he...
Ki Hasan
Boa-boa ukur dua patung satria musashi.
Lugiena De
Ki Hasan: Nyanggakeun. Bagean nu maos kanggo napsirkeunana mah. Da ari pangarang mah apan purah ngahehelok batur, atanapi tiasa janten malah ngabibingung. He he...
Ki Hasan
Geura urang toong indikasi patungna: teu usik, teu malik, ti wanci tengah poe, nepi ka parat sapeuting, teu kungsi kiih-kiih acan. leungeun kenca katuhu, teu obah-obah, angger dina posisisna. mun poe mentrang, bakal kesangan, matak ngundang rametuk ka unggal nu liangan. Hehehe
Ayém Cépian
Padungdung nu taya tungtung. Salalawasna Tarung salalawasna. Tinggorowok. Hohoak silih sentak dina simpe. Huahhhhh Eddddunnnnnn. jempol pisan.
Godi Suwarna
:"Ngan, eta judulna bet ANTI KLIMAKS. Karunya atuh ka Tuang Rai..."
Ki Hasan
Beunang tah Kang Lugiena De, tah ieu patung musashina: http://www.exoticvacationplaces.com/2010/05/ganryujima-greatest-swords-duel.html
Lugiena De
Ki Hasan: Is, sanes. Ieu mah anu ngadamel patungna Nyoman Nuarta. Heu heu heu...
Lugiena De
Abi Cepian Ibn Al-khairi: hatur nuhun. nyanggakeun
Lugiena De
@Godi Suwarna: His, ari naeun teh. Heu heu heu... Rupina leres judull ANTI KLIMAK teh verbal teuing. Atos we IJEN. Tapi bisi hayoh disebat niron tina carpon kagungan Pun Bapa. Heu heu heu...
Godi Suwarna
Ki Hasan: Wah, asoooy, Ki...! Mun ka Jepang uing pasti jaroh ka Ganryujima. Bade ngederes Go Rin No Sho..."
Ki Hasan
Jaroh geura Kang Godi Suwarna, nganjang ka sensei Mikihiro.
Lugiena De
Godi Suwarna: Ulah hilap oge nganjang ka wewengkon Kabuki Cho. Heu heu heu....
Ayém Cépian
Pun Ki Hasan, haturnuhun. Teu benten sareng Implengan sateuacana. Janten langkung karaos ngalegeday pisannnn Beuh.
Ki Hasan
Kang Abi Cepian Ibn Al-khairi, nyaan Kang Lugiena De edun ngadeskripsikeunana. Abong pangarang. Uing mah ukur nebak tina lacak, dua kalimah akhir nu diulang dina tilu paragrap.
Lies Tjandra Kantjana
Ah teu puguh tungtungna, rupina mah The Gretes Sword tea ..???
Lugiena De
Memang kitu dina pamustunganana mah Ki Hasan. Hiji hal anu anti klimak boa-boa taya bentenna sareng esensi anu geus paeh. Sapertos perang dingin kapungkur. Pan pada-pada taya nu wani miheulaan. Di hiji sisi duanana frontal adu hareupan. Tapi di hiji sisi deui duanana satekah polah nyinglar perang. Antukna siga patung. Tug ka salah sahiji pihak bobor karahayuan... alatan waktu.
Lugiena De
Lies Tjandra Kancana Sudarma: Tungtungna nya kitu, angger sapertos mimiti. He he he...