Ku Godi Suwarna
Kendang penca madungdung tengahing leuweung. “Sor, maju, siah! Aing moal mundur, deuleu !” ceuk Sakadang Pacikrak bari pasang kuda-kuda. Sakadang Merak asa diunghak. Gabret. Sakadang Pacikrak dibintih. Ger. Diadu. Ragot naker. Sakadang Lutung kahatéan. Pudigdig. Jekok nonjok Sakadang Maung. “Kunaon ari sia? Weureu gadung sia téh?” Sakadang Maung ngagaur. Sakadang Lutung dirontok. Ger. Galungan bébéakan. Kendang penca beuki ngemprung. Tarompétna nérétét matak nyérédét. Gajah ujug-ujug tingjéréwét. Gajah diadu jeung Gajah deui. Mangpirang Peucang kaleyek. Gur-ger. Nu tarung di mana-mana. Leuweung beuki gunjang-ganjing. Sakadang Bajing norolong. Muru puncer gayam kahot. “Bah! Abah! Kumaha atuh ieu téh?” Sakadang Bajing hariweusweus. “Cekéng gé, montong sok lalajo TV. Komo TV Énonésa!” walon Sakadang Bueuk bari tuluy peureum deui.