Ku Tatang Sumarsono
“Iraha cacapna kahamham anjeun téh, Ida? Kakangen anu diarep-arep kalis kedal dina ungkara sajajar. Padahal, Akang kacida nganti-ngantina, Ida cacarita ngayun ngambing, jangeun ngeusian lolongkrang nu lawas suwung. Tapi anu diarep-arep tiba ngolémbar meueusan. Matak cangkeul ngadagoan. Ida, ieu kaasih jigana baris diombakkeun dina lautan eurih, geusan gaganti sakur anu karasa peurih ….”
Geus méh saminggu, ieu SMS katampa. Bisi heueuh ngarep-ngarep, antukna dibales: “Hi-hi-hi ….Jagoan panjat tebing mélankolis en romantis. Dah …, Kang Firman ….”
Teu heuleut lila, asup SMS ti nomer anu béda: “Firman ngantunkeun di Citatah, layonna nyelap dina seuseukeut cadas ….”