Update: 10 Fébruari 2012 21:50:45

Poé Katilu

Ku Dadan Sutisna

Panto ngarekét. Jam dingding ngajerit ka angka hiji. Ngeteyep bari nangkeup kembang tilu beungkeut. Kamar simpé. Reyem-reyem. Tapi léptopna ngagebur kénéh. Siga kiceup diskotik, cahayana mawur kana gelas, tunjangeun pisan potrét nu keur imut. Paneuteup luncat kana eusi gelas. Siga aya lauk. Kawas ubur-ubur. Asa piraku. Ditelek-telek téh bet hirup. Enyur-enyuran, beureum euceuy bari rambay ku urat. Rét ka nu hurung. Panon asa koclak basa maca tulisan dina layar léptop: “Pasini urang, geus tilu taun. Dina gelas, aya kado keur di dinya. Éta téh kaéra, kasieun, jeung kawirang uing, beunang ngadudut tina angen, tuluy ditinyuh ku sésa cimata. Omat pangmulasarakeun.” Kembang nu ditangkeup boa murudul, bari irung ungas-ingus ngawawaas bau hangru nu kebek di sabudereun kamar.

Koméntar kana ieu Fikmin:
  1. Sonny Bastoni: Ari nu nulis para inohongmah rada hese neuleumannana ge.
  2. Muhammad Shohiba Nu'man: Halah.. Ngaos ieu fikmin, sim uing ngajengkang, ratug angen tutunggulan.. Hatur nuhun...
  3. Godi Suwarna: :"Eduuuun....! Ngajelegggur...! No Komeeen...! No Komeeeen...!"
  4. Godi Suwarna: :"Nu karasa ku uing dina fikmin : perkara 'ulin kecap' (istilah Ang Ganjar Kurnia) mah seueur nu tos haratam. Kalan-kalan, ulin kecap siga nu jadi tujuan utama. Padahal, dina fikmin, nu utama teh caritana. Basa mah ukur 'alat' pikeun nepikeun carita. Dina ieu fikmin, Jang Dadan Sutisna geus nuduhkeun cara ngadongeng nu matak pogot..."
  5. Yanti Sri Budiarti: Halaaaah...mangkaning malem Juma'ah...
  6. Ya Soebarta: Ajiiiib,bener ieu mah no komen tea...ke kedah 3 uihan ieu mah maosna...
  7. Godi Suwarna: :"Baraca..! Bacaaaaa....!"
  8. Tatang Sumarsono: Ka Godi Suwarna: Ceuk guru honorer teh: Enya hayu urang baca babarengan, sing imeut. Tengetan sakur ungkarana, ungkaban harti anu nyamunina. Ngan ku getol maca, kamampuh urang bakal terus kaasah.
  9. Endang Kasupardi Ti Cisurupan: Ngagurinjal reuwas. asli ieu mah, abdi ngahuleng ninggal gelas payuneun, padahal cikeneh ngaos ieu fikmin. eta gelas sesa pun anak nginum sirop beureum. bet asa ngurey...
  10. Nazarudin Azhar: pas pisan, maca ieu fikmin pareng bari nyetel lagu gotik... dongeng cinta, bari semu matak keueung..duh...
Ngeunaan Ieu Naskah:
Naskah lianna karya Dadan Sutisna
  1. Kasimpé Kafé
  2. Néang Kalangkang I
  3. Bewara
  4. Bewara
  5. Bewara
  6. Poé Katilu
  7. Lain Kaliki
  8. Sabot Usik
  9. Cai Mulang
  10. Lain Uing
  11. Congo Péstol
  12. Kolam Renang
  13. Jep
  14. Palagan Spérma
  15. Fikmin
  16. Nu Keur Nganti