Update: 06 Agustus 2016 02:59:25
Login ku Akun Facebook

Pangréana Fikmin

Pangaléwohna

Koméntar ti Kanca

Ahad, 19 Maret 2017 16:02
Yusuf S. Martawidénda: " Naha akun sim kuring dina web ieu janten aya dua. Nu hiji namina : Yusuf S Martawidenda Nun hiji deui namina : Yusuf S. Martawidénda nu hiji teu ngangge curek. Nuhiji deui ngangge curek dina e-na. TAPI NU LENGKEP DATA PROFILNA AKUN NU E-NA TEU NGANGGE CUREK HATUR..."
Salasa, 14 Maret 2017 16:22
Abdul Haris: " Alhamdulillah, kotrétan téh, tiasa katawis deui dina web. Hatur nuhun, Kang Dan...."
Kemis, 16 Fébruari 2017 12:29
Hamim Wiramihardja Coèlho: " Naha sesah geuningan bade ngeusian profil teh......."
Senén, 16 Januari 2017 06:47
Kang Mohen: " Sampurasuun..."
Ahad, 08 Januari 2017 23:29
Roni Rohendi: " Assalamualaikum, ngiring ngaderes palih..."
Rebo, 04 Januari 2017 07:41
Aris Siswanto: " ..."
Rebo, 04 Januari 2017 03:02
Elan Sudjanamihardja: " datang katimgal tarang tea meureun nya. nya bade ngiringan didieu yeuh da geuning ari nyiar pangarti mah tue aya watesna, boh umur atanapi tempat, sugan we aya paedah sareng mangpaatna. sim kuring ti aachen, jerman watesan ka walanda sareng belgia, elan sudjanamihardja, ari di aachen mah barudak mahasiswa nyarebatna..."
Ahad, 01 Januari 2017 22:33
Ridwan Melodian Plain: " Sampurasun..."

Racun

Kénging Abah Sarjang
Dipidangkeun dina lapak 08 Oktober 2011 06:41:43

Darip ngaheruk nyanghareupan taneuh beureum kuburan Néng Irma, anak tunggal Haji Ota dunungan manéhna, nu maot ngadadak tadi isukisuk. Sajongjongan manéhna ngan ukur bisa nyegruk. Ti kajauhan hawarhawar kadéngé sora azan magrib paselang jeung uncuing nu ngagelik dina pucuk caringin. Waktu nyérélék, astana beuki poék, magrib ngaléngléong kapalidkeun peuting. Darip angger nyuuh satunjangeun kuburan, teu paduli reungit nu napuk nyocoan.

Ti kajauhan Haji Ota jeung rombongan nu rek ngaji di makam, ngalabring mawa patromak. “Darip?” Haji Ota mencrong barang mireungeuh badégana aya di dinya. “Kadieu heula sakeudeng, aya piobroleun.” Lalaunan Haji Ota nuyun leungeun Darip, ngajauhan makam. “Rip, manéh gé apal, Si Enéng téh sok babarengan jeung Dokter Ocid, Dokter Ocidna geus sering nyarita, hayang ngalamar. Saminggu ka tukang ku Bapa ditalék, nanyakeun hubungan manéhna jeung Dokter Ocid, Si Enéng kalahka gideug bari ceurik. Bapa tuluy nanya, bisi manéhna boga kabogoh, sok da Bapa gé moal maksa ieuh. Lilalila Si Enéng balaka, bogoh ka manéh, cenah. Bapa ogé rada reuwas harita mah, ngan meureunan geus jodo, sanggeus dua tilu poé mikir, Bapa nyatujuan kana kahayangna, manéhna bungaheun pisan.” Haji Ota narik nafas panjang bari nyusutan cipanon. “Hanjakal kaburu dipundut, Bapa teu bisa nedunan kahayangna, hampura Darip, Bapa lila teuing mikir, sugan téh moal kieu jadina.” Haji Ota ngagukguk nyuuh kana taktak Darip.

Aya guludug gedé pisan ngabéntar hulu angen Darip, ngajelegurkeun jantungna, mancawura ka manamana. Haté Darip ngajerit sasambat “Duh Néng Irma, hampura uing Néng, sugan téh Enéng rék tulus jeung Dokter Ocid, uing dirérab timburu, nempo Enéng sakitu bungahna, uing jadi salah harti, hampura Néng.” Darip nyuuh kana taneuh, rasa hanjelu lir palu nutug embunembunan, lantaran manéhna pisan, nu ngaracun Néng Irma nepi ka maotna.

Komentar (36)

Irfan
kacida abah mah...uing jadi carindakdak...
Sarjang
Hehe... tetela hese ngaheureutkeun carita...
Sarjang
Irfan El Fikr : Rarasaan teh asa panjang teuing nya..?
Irfan
duka tah bah perkawis eta mah...heu
Ahmad Yani
Sapertos Janten ciri Khas si abah ! , Tiap Carita ngandung unsur " Surprise " , nu ngajantenkeun matak pogot macana ! ( Nuhuan ah ! Abah !! )
Sarjang
Ahmad Yani : Ah nuju kaleresan we panginten Kang... upami dijantenkeun ciri khas mah abot ka payunna.. hehe... Nuhun Kang!
Yadi Fathur
Halah....sanggeus maca fikmin ieu. aya guludug, Abah,.. dina manah kula..?
Sarjang
Yadi Fathur Berkata : Hehe... kade atuh Kang bilih bom bunuh diri...
Ahmad Fawzy Imron
Jempol bah..
Sarjang
Ahmad Fawzy Imron : Nuhun Kang... 'how do' pokona mah... hehe...
Shohiba Nu'man
Beu, aya ku teungteuingeun bah..
Didon Nurdani
Abi mah teu ngiringan, bah....
Kang Insan
mani sedih euy.....
Toni Lesmana
Na ari si Darip bet timburu atuh nya? kdituna pasti eta si darip ngaleguk racun oge da bade ngudag Neng Irma ka jero kuburan....hehehehe. Pedo, Abah Sarjang!
Sarjang
Muhammad Shohiba Nu'man : Si Darip nu teungteuingeun mah Kang..
Sarjang
Didon Nurdani : Har kapan cenah racunna ti Ang Didon...hehe..
Sarjang
Insan Purnama : Mni sedih ku saha Kang? Ku Neng Irma, ku Darip?
Sarjang
Toni Lesmana : Maklum Kang Ton, Si Darip micinta kabinabina... saterasna aya episod ka dua mangga diantos...
Sarjang
Kamana Kang Haji Yusran Arifin nya, biasana sok asa katonjok, ku nu ieu mah jigana teu katonjok...
Sarjang
Insan Purnama : Punten ari Akang teh asli karawang?
Sarjang
Haturan kanggo Kang Ari Haryanto ieu racun pamasihan tos dipasihkeun ka Neng Irma.
Ari Haryanto
Ongkoh tuda bapana lila teuing mikir padahal lain kudu kitu nu jadi kolotmah,darip deui rarusuh teu puguh bakat sieun di pimilik batur nya pikirna mening paeh we eta budak haji ota teh,halah..
Sarjang
Ari Haryanto : samisami salah sambung nya Kang....
Dadang Soekanda
Bah. Pasihan cai jampe, itu kang Ari Haryanto janten esmosi...rarayna meni euceuy.
Sarjang
Dadang Soekanda : Hahaha... jigana mah aya hate ka Neng Irma, mung kabujeng diracun, janten we bendu Kang...
Ki Baba Gibson
hayang bisa nyieun fikmin siga kieu..... aaahhhh (ngajenggutan sabulu-bulu )
Sarjang
Lalat Socrates : Aaah si Akang mni kitu.. (ngadilak terus tungkul bari ngoprek ramo)
Ki Baba Gibson
waduuuuhhh horeng beurat pisan geuning pameulina, nya...? ambuing-ambuing... asa moal kataekan... hahaha
Sarjang
Lalat Socrates : Aaah massa seeeh??
Yusran Arifin
Wuuusssss.. Tiris abah.. Demam anjrit uing macana..
Sarjang
Yusran Arifin : Alaaah, dugi ka demam kitu mah, boaboa karacunan Kang Haj...
Sarjang
Godi Suwarna : dupi nu ieu kumaha Kang Prab?
Godi Suwarna
:"Hade nu ieu ge, 'Bah..! Pungkasanana...! Tapi, cek uing, sa-uingeun, Fikmin nu ieu mah dipidamel dina sumanget nyarpon. Melar teuing. Seueur teuing flashback. Uing mah resep ka nu pondok bari ulah pondok teuing, irit kecap kawas ngirit dina nyajak, genah basana tapi lugas, bada maca aya nu karaos ngaweuhan dina sirah jeung hate. Kitu cek pamanggih uing mah, "Bah..!"
Sarjang
Tah eta nu diantos ti Kakang Prabu Godi Suwarna teh... Ulasan nu samodel kieu, tumerapna ka sim uing nambah pangaweruh sareng ngagedurkeun sumanget pikeun terus ngasah karya.... Nuhun, katampi pisan Kang Prab!
Godi Suwarna
:"Dawuh Mahaguru uing, Bagawan Sirnadiraga Popo Iskandar, kirang-kirangna metakeun mah, flashback teh matak janten kaghengker kana leunjeuran carita. Rupina, dina fikmin mah karaos pisan eta teh. Cobi uningaan deui fikmin terjemahan kintunan Endah Dinda Jenura, ampir sadaya teu ngangge flasback..."
Sarjang
Godi Suwarna : Siap Kakang, piwuruk seja diestokeun pisan... Parantos eta ge diaos kintunan Teh Neng Endah Dinda Jenura teh. Mung da wawasanna cupet, sakadar diaos we, teu tiasa mulungna.. Nuhun deui bae, duka anu ka sabaraha kalina... Nuhun Kang Prab!