Bulan jiga nu kabulusan, nyumput nyamuni di nu buni. Baranangna béntang teuing kamarana jiga ninggalkeun jagat sina meredong mongkléng. Handapeun reyem-reyemna lampu mercuri aya wanoja nyulik tilu lalaki bari nodongkeun ruruhit ilat amisna, kedalna ngawirahma dina sora nu kacida manisna.
“For love or money? The power of love, or the power of money?” pokna, iinggrisan bari imut manis dina teuteup geugeut pupulasan.
“Horéng agungna cinta, béhna mah loba nu dipulas alatan ngarah harta…” gerentes lalaki nu kahiji
“Geuning martabat diri téh geus teu dipiroséa….” Gerentes lalaki nu kadua.
“Aing geus diturih ku hinis kapeurih dina jutaan pasang mata, di dunya maya, cinta dipaké néangan harta….” Gerendeng lalaki nu katilu. “Kanyaah aing béhna mah dijieun kasempetan pikeun nguras harta….”
“Hey! For love or money? The power of love, or the power of money? Waler!” ceuk si wanoja bari kelat-kelét pinuh mamanis.
Tilu lalaki ngaharuleng jiga nu teu wasa méré jawaban.