Abdi gaduh kuda balap, buluna daragem. Kanggo anu muhit caturangga, ieu kuda teu kapeunteun, margi kukulinciranana buaya ngangsar.
Panceg umur dua taun, nya disina ngiring kana Pacuan Perdana husus Kelas Remaja.
Sabrengna ti starting gate, kuda abdi ngan sageretekan lumpatna. Saterasna mah jadi ngendoran, malih milih jalanna gé mabal ka kénca.
Anu sanés tos kénging piala, kuda abdi mah nembé ngurunyung. Atuh disarurakan ku nu nongton.
“Lésot tali kadalina. Untung sayah teu ragrag,” saur joki bangun isin, wiréh dongkap pangbocotna.
“Ih, nya keun baé,” saur Bapa Komisi Pacuan. “Ieu kuda téh intuisina alus. Sakitu teu maké kadali, tapi teu burung tepi ka nu dijugjug. Hanas anu dipilihna jalur kénca, nya teu nanaon, nu penting matak salamet saréréa. Aya di jalur katuhu gé keur naon, ari matak barubah ka balaréa mah.”
Énjingna kuda abdi digaleuh ku hiji kementrian. Saurna badé dianggo conto minangka “Tokoh Teladan” di ieu républik.
Catetan: Ieu gé sami kénging ngaropéa tina fikmin heubeul.