Waktu lumaku.
Béntang-béntang ngaWuluku. Enya teu katingali, moncorong di Langit; da éléh ku cahya MataPoé. Tujuh lapis, bisa ogé, tujuh belas tawa tujuh puluh lapis langit. Naon bédana.
Isuk-isuk ngaléngkah ka Pabeubeurang. Saacan beurang. Di Mumunggang, mencek lulumpatan. Nu bikang nuyun anak-anakna. Ngaprak ka lembur. Bongan leuweung geus taya wibawaan. Da bongan kaina diparagatan. Cinyusuna dipalingan. Merak ngan ukur jadi dongengan. Lain implengan kahirupan. Orang utan, Maung, Landak, Bagong, Kancil dibedil. Gunung burindil. Pasir bulistir.
Manusa jaman modéren. Geus jadi paninggaran, alam direcah bébéakan. Teu kacipta lamun sireum geus pareum. Siraru taya kujurna. Londok teu bisa deui kapoconghok. Oray Kisi teu wanoh deui ka cai.
Waktu lumaku.