Jangkung gedé. Beuteung budayut. Kulitna hideung. Najan lalaki, tapi buukna panjang sacangkéng. Katelahna Asép Dugul.
Manéhna téh alumni Pasantrén Sindangsari. Murid kanyaah pangersa mama keur masantrén mah. Katalar sakabéh kitab nu diajarkeun. Tara elat migawé pasunatan. Duha jalan, tahajud dikeureuyeuh, puasa senén kemis gé tara tinggaleun.
Ari ayeuna, gawéna téh jadi komandan proyék ngecor jalan. Lain nu ngecorna, tapi bagéan nyekel kaléng biskuit, méntaan duit ka unggal nu mawa kandaraan.
Kadang sok hayang seuri lamun ningali manéhna ngobrol. Sok ngadalil maké Ayat Quran. Malah sok maké tapsir sagalana, ngan tungtungna dipapaés ku unyang-anying atawa bugang-bagong.
Cenah, manéhna boga cita-cita hayang ngadegkeun pasantrén tina bati jadi komandan ngecor jalan téh. Malah hayang naék haji sagala. Bari keukeuh embung ganti ngaran. "Apan hadé mun aya pingpinan pasantrén ngaranna KH.Asép Dugul," ceuk manéhna, teu kireum-kireum.