Bisma geus rubuh. Najan kitu can tangtu meunang Pandawa téh. Sabab gantina panglima Kurawa Resi Drona, guruna. Resi Drona nu tadina kémpréng naha atuh waktuna perang mah dumadakan cageur. Ngulinkeun pedang, gada, komo mentangkeun panah mah kacida tapisna. Taya bédana jeung Bisma. Saha nu bisa ngayonan wewesén Drona. Arjuna najan hébat gé apan muridna. Saluhurna gé taktak moal ngaluhuran sirah. Duryudana ngagakgak nénjo prajurit nu aya dipihak Pandawa pating kocéak katiruk panah. Pandawa kadéséh. Keresna surti nempo Arjuna bingung téh. Gelenyu imut. “Tulungan, Kang,” cénah. “Antosan, Yi!” jut tina karéta. Kaluar ti médan laga, kuncung-kuncung muru rahayat nu keur ngagimbung di sisi tegal Kurusétra. Tuluy ngaharéwos ka tukang céndol. Teuing naon nu diomongkeun Keresna, geus kitu asup deui ka médan perang. Teu kungsi lila rob téh nu lalajo ningker dalang. Tukang céndol nyorowok, “Dalang tong licik! Drona téh kémpréng naha jadi jagoan!” Nu lalajo ngoyag-ngoyag panggung. Dalang ngadégdég handapeun gebog.