Pluk. Tarompét ragrag tina cekelan Aki. Leungeunna nu geus lilineun teu kuateun. Da dibarungku lini nyaan. Jagat ngarieg. Najan ukur itungan detik. Loba imah anu rubuh. Wangunan paburantak. Kendang, goong, nayaga, racleng, duka ka mendi. Manéhna ngajurahroh gigireun Jaman. Untung teu diluluh gé. Jaman molotot nulak cangkéng. Aki hudang lalaunan. Ngeprukan ruruntuk budaya. Nu pinuh ku harimumu. Gap kana tarompét kameumeut. Diberesihan. Ditatap. Diusap. Teu karasa cimatana ngeclak. Rét kana saukujur awak nu kagampar dina eunteung retak. Kulit peungkeur kari kenyodna. Tapi rikatna metakeun jurus napel kénéh. Nyéh imut. Pasang kuda-kuda. Tarompét ditiup dina lagu buah kawung. Sorana patingsaléor. Sugan bisa kawas bihari. Tarompét disimpen deui. Teu kungsi lila barudak sakola patingtorojol. Aya ogé urang asing. Nareuteup sekeut kana tarompét nu dipajang. Kahalangan ku kaca. Guide. Pepeta nerangkeun. Aki neuteup ti jauhna. Laju ngaléngkah, maksudna hayang negrakeun kareueus. Orokaya Jaman kaburu megatan. Aki maksa. Jaman keuheul. Jebrod. Ngagaplok. Aki ngadalideug.