Méh dua jam kuring nunggu. Lieuk deui lieuk deui. Ngajentul di sisi jalan, nedunan jangji pasini. Tepung lawung nu munggaran, najan geus lana saati.
Dumadak kuring curinghak, mireng hapé nu ngagelik. És ém és geuwat dibaca, "Sakedap deui gé dugi," bungah nu taya tanding, ngan haté bet beuki ratug. Awak patingsariak. Atoh nu kaliwat saking, beuteung kukurubukan gé teu dirasa.
"Ngantosan di lapang parkir, acuk beureum tiung héjo," Giak muru nu keur nangtung. Naha geuning nini-nini? Ti tukang aya nu nepak, "Ieu, Aa. Sanés éta."
Catetan:
- KINANTI. Watek: Nungguan, deudeupeun, kanyaah.
8-u, 8-i, 8-a, 8-i, 8-a, 8-i
- SINOM. Watek: Gumbira, kadeudeuh.
8-a, 8-i, 8-a, 8-i, 7-i, 8-u, 7-a, 8-i, 12-a
- WIRANGRONG. Watek: Kawiwirangan.
8-i, 8-o, 8-u, 8-i, 8-a, 8-a