Gék diuk dinu korsi pangtukangna, deukeut jandéla beulah kénca. Kabeneran korsi sagédéngeun kosong. Hawa karasa beurat, tinu rénghap nu panjang. Ngadayagdag. Jalan molongpong. Jandéla kaca niis ciibun peuting. Simpé. Panumpang séjénna diuk arajeg, ngawirahma jeung laju beus. Nu nyemprung di jalan nu euweuh tungtung.
Lamun seg, tadi euweuh béja Ratri cilaka, katabrak beus, meureun moal tuturubun megat beus tengah peuting jiga kieu. Ratri, nu kungsi ngait kanu ati. Huuh, ukur bisa rumahuh. Panon dipeureumkeun. Tibra. Janari geus kaliwat ganti ku isuk-isuk. Panon poé mélétét ngagurat langit ku warna konéng emas. Panon beunta. Geubeg, ngarénjag tinu korsi. Sagala kaciri. Panumpang séjén angger diuk arajeg. Ngilu wirahma beus. Jalan molongpong euweuh tungtung. Jung nangtung. Kemba. Panumpang séjénna geus jaradi nini-nini jeung aki-aki. Katut supir jeung kondekturna geus jadi rorongkong. Beus nyemprung di jalan euweuh tungtung. Kuring ngocéak muru panto beus nu dikonci. Jejeritan nyakaran jandéla kaca. Panumpang séjén diuk arajeg ngawirahma jeung beus. Tingséréngéh.