Dulugdugdag. Dulag Saur ngadulugdag. Kuniang hudang. Cikopi ngebul sabekong. Lalawuhna goréng ulén. Karembu. Sangu haneut ngabagug. Lodéh waluh, gepuk sapi. Nyayagikeun nu rék saur. "Nun Gusti, najan saur sawaregna, pamugi ditampi saum abdi!"
Bray beurang. Kencling ka pagawéan. Rohangan gawé full AC. Ngadeluk ngahanca garapan. Dur lohor. Geuleuyeung ka masigit. Masjid beresih. Angin humiliwir. Saméang, ngaderes. Nyalsé. Tumaninah. Rérés lohor parat nepi ka asar. Neruskeun hanca nu katunda. "Nun Gusti, najan mentrang teu kasorang, halabhab teu karandapan, peurih patuangan teu marojéngja, pamugi ditampi saum abdi!"
Dur magrib. Ngabarak dahareun saméja. Sangu pulen ngebul kénéh. Opor hayam, pais nilem. Lalab gedang, sambel medok. Cangkaléng jeung kolek cau. Ngadago nu buka puasa. "Nun Gusti, najan buka sawaregna, pamugi ditampi saum abdi!"