Gebeg. Kalabasan. Réngsé asar gogoléran. Alarm teu diaktifkeun. Sakeudeung deui manjing ka magrib. Gura-giru ka masigit. Geus rempeg. Hémpak. Jamaah 'buka bersama' arandekak. Sanyiruna-sanyiruna. Diriung ku opat-lima urang. Rét ka kénca! Ka katuhu! Pinuh. Taya lolongkrang. Mending magrib heula. Koloyong ka tempat wudu. Ngong adan. Sahéng nu balakéncrakan. Melenghir seungit 'Kari Ayam'. Sabot nungguan réngsé adan. Ngajengjen. Torojol Pa Arab. Nyéréngéh. Nanggeuy korma opat siki. Ngasong-ngasong. "Ta'jil brother! Ta'jil! Halal!" Keukeuh. Teu cukup ku gideug. Éléh déét. Kop sasiki. "Syukron!" Belewek. Empuk. Legit. Korma Madu. "Duh aya ku bagja ari ilaing Pa Arab. Ladang puasa aing sapoé jeput, bati méréngkélkeun peujit, pahalana ukur ditukeuran ku korma sasiki!"