Janari leutik pakpikpek di dapur. Cai asak ngebul. Meujeuhna keur ninyuh kopi. Karesep Abahna. Tara kaliwat. Saban Janari-Magrib ngarot kopi pait. Sangu pulen Pandan Wangi bulak-balik diakeul. Dieurihkeun kana ceting. Lodéh waluh Siem dituuskeun. Opor hayam kampung geus empuk. Melengseng ngabibita. Dulugdugdag-dulugdugdag. Hawar-hawar sora dulag. Sor mémérés méja makan. Katuhueun maneuh tempat Abahna. Beulah-kénca paragi si Panengah jeung si Bungsu. Si Cikal beulah-kulon papahareup. Cara sasari. Sapiring-sapiring dialasan. Citéh manis ngabagug dina poci. Laukna mah sapangaresepna. Nyiuk séwang-séwang. "Sok atuh geura salaur! Bisi kaburu Subuh. Tah dada mentona kasedep Tétéh! Ani sareng Adé mah resep jangjang sareng walikatna nya? Kanggo Abah mah ieu tah, pingpingna! Éta sayur lodéhna tah! Tong kaliwat!" Kohkol ngurulung ti musola. Ngong adan Subuh. Nu sujud cipruk juuh cisoca. Salat munfarid mangsa munggahan puasa.