Nyi Ipah mukaan koran, meunang hujan warta. Koran dibalangkeun, cetrék ngahirupkeun tipi. Inyana meunang hujan hiburan, gosip, warta, jeung iklan. Sajongjongan lalajo sinetron. Lain ngabandungan caritana tapi ngimeutan aktor-aktor lalakina nu gandang siga nu nulis ieu fikmin. Gosip tah tangtu, moal aya nu percaya. Teu lila tipi dipaéhan.
Ngalamun teu puguh nu dilamun, paneuteupna amprok jeung laptop. Dihirupkeun terus login ka Facebook. Meunang hujan deui waé, hujan status jeung komén. Nyi Ipah gegelenyuan sorangan, sakapeung jebi, sakapeung kerung, belenyéh deui.
Rada lila manco dina Facebook, Nyi Ipah anteng bari lalangiran. Sakapeung gagaro kana cangkéngna. Langit mimiti angkeub pihujaneun, katingali tina kaca jandela. Gura-giru Nyi Ipah kaluar ngajaitan popoéan. Gebrét hujan turun, inyana manco deui dina Facebook. Tuluy nulis status nu unina : Hujan.
Ngan sakitu-kituna éta status téh. Itung-itung bébéja ka dunya yén di wewengkonna keur hujan.