"Tos waktosna Bapa mutuskeun, bade milih abdi atanapi Nenden?" ceuk pamajikanana memeh sare. Ampir unggal waktu nyarita kituna teh, saprak manehna kanyahoan salingkuh jeung Nenden. "Bapa kedah tegas, da Mamah mah alim diwayuh," ceuk pamajikanana nyarita deui. Panon pamajikanana diteuteup, terus ditangkeup. Manehna gilig, geus waktuna nyieun putusan. Ari pamajikanana, apalna teh ngan ka Nenden wungkul, padahal aya Euis. Pabeurat-beurat beusi tiluanana ge. Nenden genah diajak ngobrolna, Euis nineung ku getenna, ari pamajikanana muji ku sabarna. "Wengi ieu Bapa bade mutuskeun," ceuk manehna bari nyokot duit kencring. "Saleresna dina kahirupan Bapa teh sanes mung wungkul aya Mamah sareng Nenden, tapi aya Euis deuih. Tah ayeuna Bapa bade mutuskeun ku cara nyentring ieu artos. Upami nangkarakna gambar garuda, Bapa bade milih Nenden. Upami nangkarakna rupiah, Bapa bade milih Euis. Upami ragragna nangtung, Bapa bade satia ka Mamah," ceuk manehna bari nyentring kencring. Pamajikanana nyerangkeun bari pinuh ku pangharepan.