Basa Hajat keur tatahar kénéh, Simpé geus nguniang hudang,
miheulaan ngahiang, rerencepan bari ngawur-ngawur bayeungyang.
Peutingna, Simpé datang deui. Ngajanggélék jaradi béntang-
béntang nu baranang, milu cingogo, lolongséran tingcakakak,
milu liud, nyurup dina léngkah jeung paripolah;
Isukna, Simpé geus ngadodoho. Nungguan ngeclakna cihujan nu
geus dibendung jeroning dua peuting. Tug nepi Hajat geus lekasan,
Simpé nyulusup diunggal juru. Mulungan panineungan nu ngalayah.
Nu taringgaleun jeung nu ngahaja ditaringgalkeun.