Karajaan jadi keueung ti harita. Basa permaisuri raja kapanggih midua. Raja Syahrir, anu arip bijaksana jadi murka taya muliana. Karajaan nambru dina péta nusantara. Wibawa kahurmatan pabalatak di nagri malarat. Ekonomi nu jadi kakuatan runtuh nepika akar-akarna. Raja raheut hatena, digulung kabingung, binasa jadi panungtung. Pajabat lain ditugaskeun ngurus karajaan. Hiji-hijina paréntah nyaéta kudu néangan parawan ti rahayat pikeun dijadikeun permaisuri. Kudu awéwé geulis taya cacat pisik atawa cacat séjénna. Sing saha anu ngahalangan moal aya ampun langsung ditéwak, diparabkeun ka méong. Dijadikeun permaisuri keur sapeutingeun, isuk-isukna digusur ku algojo. Dipancung. Cenah keur ngubaran nyeri haté. Syahrazadé teu téga ninggali kaayaan kitu. Niat rék nyieun siasat pikeun ngeureunan kabiasaan raja. Nawarkeun diri. Raja molotot ninggali Syahrazadé. Putri teu ngalawan, basa raja ngalampiaskeun napsuna. Tina kondé, nyabut paku. Raja ditangkeup pageuh, api-api ngalayanan. Itungan katilu. Leungit rénghap anu bejat. Ilang cabak leungeun biadab. Putri Syahrazadé, nguntun hordéng, dicangreudkeun kana tihang jandéla.