"Kehed teh, wanina ukur ka awewe!," sora salaki ngagaur bari tipepereket ngeupeul ramo. Panon mencrong kana TV nu ngaguar warta pejabat nu katohyan kawin siri ukur saminggueun. Kuring ukur mesem, bagja geuning boga salaki nu sakitu belana ka awewe, komo kanu jadi pamajikan mah. Karasa kanyaahna teh, teu sirikna ngogo jeung minuhan sagala rupa kabutuhan lahir batin. Tara hahaok, malah sok mapatahan lamun kuring salah teh. "Tiiiriiliiit..." Sora hp disada. Jung kuring nangtung tina korsi, rek mangmawakeun hp salaki nu disada, manehna mah teu mireungeuh sora hp da keur anteng keneh ngabandungan TV. Leungeun geus rek ngasongkeun hp, barang ret dina ngaranna 'mamih'. Kuring panasaran, tuluy dibuka sms-na, 'pih, sayaaaang, besok nginep lagi yaa..kangeen..muaach..!'. Harita keneh, hp ditompokeun kanu panon salaki, nu ngarenjag, sepa, pias saharita. Teu walakaya.