Hirup kakolotnakeun, beuki karasa. Ladang murugul mawa karep sorangan. Lieuk euweuh ragap taya. Banda ludes taya nu nyesa. Ayeuna nyiruruk di imah dulur awewe. Leumpangna geus rada ngarampeol, alatan kasakit setruk. Teuteupna mencrong kana surat nu cikeneh katampa. Beja ti bank. Yen imah baturna nu basa harita digadekeun keur modal nyalon kuwu, rek di lelang. Nu boga imahna tembong keur molotot. Kekerot. Menta tanggung jawabna. "Kumaha..!" sentakna. Nu disentak kalah malik molotot. "Ari geus rek mayar make naon?! Katempo meureun ku sia oge. Aing sakieu kaayaanna?!" tembalna, teu eleh galak. "Gooblog siah! Kalah molotot?!" sentak baturna. Gajleng. Jebrod! Nonjok carehamna. Jebrod! Jejekna nenggel kana dadana. Gubrag! Nangkarak, bareng jeung korsi nu didiukanna. "Sok siah mun teu tanggung jawab!". Gejlig! Indit. Ninggalkeun manehna nu keur kusah koseh hayang hudang. Juuh ku cimata bangreung.