Saged. Tuan Rasita. Kundang payung. Mapay jadwal nu ngurebkeun poé harita. Lain baraya. Lain sasaha. Teuing saha. Ka Sirnalaya, gerentesna. Muru nu keur macakeun telekin. Milu ngawurkeun taneuh beureum. Milu ngadu'a. Rérés hiji. Jung deui. Tuan Rasita. Nuluykeun lumaku. Ka Sirnaraga, gerentesna deui. Milu ngawurkeun taneuh beureum deui. Milu ngadu'a deui. Kitu jeung kitu. Nepika burit. Nepika bedug magrib. Isukna. Nguriling deui. Unggal poé milu ngurebkeun. Unggal poé ngurilingan saban pajaratan. Cacap. Sabulan. Nepika malem lebaran. Giliran aing iraha?